أمس العصر نطيت رأس المنيفة
طويلة المرقاب دون ام دباب
عديت في رأسه ونفسي كسيفه
وأمسيت بالمرقاب حتى الشفق غاب
ابكي وأهل من المدامع ذريفه
على وليف منه خايف ومرتاب
طفل نهب مكنون عقلي بكيفه
الراس شاب وخاطري منه ماتاب
سلط على بالود رمحه وسيفه
متخالف بالقلب تسعين مضراب
يومي عليه القلب مثل السفيفه
تفطرت كبدي على عذب الانياب
ان شفت زوله فز قلبي لطيفه
وتكسر العبره بصدري ليا غاب
عيني على فرقاه حذر نزيفه
هداج دبله دمع عيني ليانساب
ياطير ياللي بالخضيرا رفيفه
ليتك تود العلم مني للحباب
قله ترى نفس المهاوي ضعيفه
يلعي كما لورقا وماحابته جاب
يعوي كما لاضاري ويهرف هريفه
والي طلع مرقاب حول لمرقاب
كله على طفلٍ هر وجه لطيفه
ترياق ري ريقه كنه الشهد لاذاب
يزعل علي وكيفه ويرضى بكيفه
وقلبي يصايد رغبته منه منصاب
والله ماشافت عيوني وصيفه
من الساحل الغربي الى رأس مشعاب
وأيضاً بنجد او بالحجاز ومصيفه
ماهمنتي بالبيض تلعات الاقاب
لا الوليف اللي صفا مع وليفه
طفل عليه من الطنا عارضي شاب
وجدي وجود اللي غدا بالحتيفه
بارض خلا والداب علق به الناب
ماعنده الا الذيب بارض مخيفه
يكسر ويقنب له على راس مرقاب
يبغى السلامة والسلامة كليفه
والعبد ماله عن مقادير الاسباب
ياروح روحي طب قلبي وريفه
انت الذي نهبت عقلي والالباب
صار السهر للعين لجلك وظيفه
يقعد العيني تالي الليل حراب
