تهيض لك غرامي والغلا عندي ولع وجنون

انا اللي لى عشقت استخلف الله عقلي الغادي

الا يا اجمل فرح يا اجمل حزن يالهفة المفتون

خيالك يلبس وجيه العباد ويلبس رقادي

جفيت وضاقت الدنيا الوسيعه وضاق بي هالكون

ولقيت بطيفك اللي زارني موتي وميلادي

الى اقبل طيفك الثلجي تبدل به بياض اللون

خذا لون الخريف وبه حمار المغرب الهادي

اهوجس لي خذا لون الخزامي واختفى بالهون

لك الله ما تلاش الا ودمعي بلل وسادي

صدق راع المثل ساعة يقول ان الجنون فنون

ويا كذب الصبر في حزة يجيني ويكذب عنادي

احبك والذي جدد عزاي وحزني المدفون

لانك ساكن الجفن السهير وساكن فؤادي

صعيبٍ بالفراق اللي طعني والخفا مطعون

من اللي صار في وادي بعيد وصرت في وادي

حزن حتى الحزن واقفى خجل من حزني المحزون

تنحى عن عذابي يستغيث عيون حسادي