كلنا إيمان في حكم القدر

والمنيّه حق في هذا الوجود

لوعة الفرقا أحَر من الجمر

والمقدر صار يُمه يالعنود

في جِنان الخُلد لِك طول العمر

ولك غلا بعيوننا دايم يزود

يرحمك ربي عدد قطر المطر

وعد حبات الصحاري والنفود

وعد ما كبّر على القبله بشر

وعد ركعات المصلي والسجود

الحزن فينا كسى كل الصور

ويا عسى هَم المفارق ما يعود

عايشه فينا مثل غصنٍ خضر

تبخل الدنيا وهو دايم يجود

يا غلانا,, منزلك وسط النظر

وفي ضمير الكل يا أُم الفهود

باقيه باحساسنا عز وفخر

وقصة الحب العظيم بلا حدود

لو يردك دمع سيّلنا بحر

ولو يردك صوتنا صرنا رعود

آه يمه ما لنا غير الصبر

والعزا لكل الوطن وآل السعود