* الجبيل - الجزيرة
اقيمت في مخيم شركة سافكو وابن البيطار بالجبيل الصناعية امسية شعرية قام بتنظيمها الشاعر والكاتب سعد بن يوسف الحميداني وقد شارك فيها عدد من الشعراء من الشرقية والرياض وهم فهيد بن سلطان التميمي وفرحان بن عبدالله الفرحان ومحمد سعد السبيعي وابراهيم بن حمد النجيدي وسليمان الرحيلي ودعيكان المري وسعدون الشمري وعيسى بن عبدالعزيز الخاطر وسعد بن خالد الحربي وحمد الخالدي وحضرها العديد من الشعراء ومحبي الشعر كما شرفها عدد من المسئولين واعيان الجبيل ومن الحضور الشيخ ناصر بن محمد الخاطر احد اعيان الجبيل وقد كانت ليلة حضر بها الشعر ورسم الفرحة في قلوب الحضور كما عطر سماء شاطىء الجبيل الصناعية وقد اشتملت الامسية على العديد من القصائد ولكن استحوذ على اغلبها القصائد الوطنية وذلك تزامنا مع مرور مائة عام على تأسيس المملكة على يد المغفور له بإذن الله الملك عبدالعزيز بن عبدالرحمن آل سعود طيب الله ثراه ونالت استحسان الجميع وذلك من خلال شمولية موضوعاتها وادار الامسية الشاعر سعد يوسف الحميداني وقد بدأت الامسية بقصيدة للشاعر فهيد سلطان التميمي والتي بدأها في الغزل وقال فيها

مابيك مابي غلاك وصوتك المغري حبك نزعته من اعماقي ووجداني الطعنة اللي طعنت العام في صدري تسببت في شقا عمري وحرماني مانيب,, صحيح ابحرت في بحري لوجيت في شاطئ الغربه ترضاني لاالفجر فجرك ولانورك سطع بدري ياثورة الحزن ياثاري وبركاني مسكين ماتعرف احساسي ولاقدري صحراك ماتشرب انهاري وغدراني لاتنتظر رجعتي لاتنتظر عذري ضماك ماي الضما مع,, الاغصاني خل الثريا تجاوب صوتك الجهري يمكن تعاطف معك لاصرت وحداني ابشرك طاب جرحي وانجبر كسري عالجت نفسي بنفسي والله انجاني

وعند انقضاء قصيدة الغزل قام مدير الامسية بالقاء قصيدة يرحب فيها بالشيخ ناصر بن محمد الخاطر الذي شرف الحفل وتقول القصيدة

هلا كثر الكلام وكثر ماتتردد الانفاس هلا كثر الوجيه اللي بحفلتنا تحفوى فيك هلا من شاعر قصر المعاني باني له ساس هلا بك والحضور اسرور الله انه يحيك رسمنا لك من الازهار فاحت صفحة الكراس نموذج من نفيس الشعر في هذا المسا نهديك علوم ارجال من فنجال تطرد كايد الاعماس تراحيب المطر واكثر من رجال ترحب فيك مسا ليلا ضحوك الشعر له في ليلنا انفاس مساء موج رقص للسيف صاخب راعده يشديك مساء نجوم غدت بالليل تطرد رايق النسناس مسا وروداً مسهرها الندى لجل انه ايحاكيك

ثم بعد ذلك جاء دور الوطن حيث شارك الشاعر فرحان الفرحان بقصيدة وطنية قال فيها

سألت موج البحر حدثني عن الماضي التليد يوم الامام بساحلك يرسم على وجه الرمال يرسم مراسي للامل يبني له القصر المشيد والشوق للعارض تعاظم والعزاء عنه استحال هو حدث الفيروز واصدافك عن احلام الحفيد عن شوقه اللي من سنين يحفزه شد الرحال عن دولة اجداده عن احلامه عن العهد المجيد هو بعثر اسراره على النورس على صمت السلال هو سافر بحلمه هناك بلجتك وابعد بعيد هو جازف بحلمه بلا مجداف وشراع وحبال قال اسأل المحني وعتمات الليال وسبع بيد واسأل يعف يبرين والصمان وشعاب وتلال واسأل ليال الشرق عن من كان همه يستعيد ملك تقهقر يوم ميزان الدهر طفف ومال عن ملحمة عبدالعزيز اسأل سناء فجر السعيد كيف ابتدت كيف انتهت كيف احتوى الفجر الخيال وشلون صاغ من الشتات لدولته عقد فريد من البحر حتى البحر ومن الجنوب الى شمال غنت مداينها طرب وافراح واخضر الجريد وترنمت كل السواحل والصحاري والجبال نشوى يجللها الفرح تختال بالحكم الرشيد وتفاخر بعبد العزيز فاخروها ارجالها سألت موج البحر كيف ايعانق الذكرى قصيد قال انثر احروفك وفاء واترك للايام السؤال

ثم شارك الشاعر محمد سعد السبيعي بهذه القصيده والتي اهداها لوالده ويقول فيها

بسمه بديت القاف واصوغ لمثال مثايلا يطرب لها من سمعها خليتها تمشي على روس لقذال حيث اتجاه الغرب يمة سنعها تنصى الذي ذكره مع الوقت مازال سوى المراجل كلبوها جمعها ابوي عن درب المراجل فلا مال نفسه على العليا يسوقه طمعها عزيز نفس وللصعيبات حلال وليه الفخر برياه يوم اتبعها ابوي يامشكاي ياطيب الفال المرجله لك ساس ماتصتنعها بشكي عليك الحال من شوف لهوال ناس تكبر بس منهو خدعها ناس تغير بين حل وترحال ناس على الضيحه يغرك لمعها وقت الرخا رفيقك اللي على البال باللازمه والله قليل نفعها وايوم وقت فيه تحتار عقال وكل شرع له بدعة وابتدعها شيبان هذا الوقت بعقول جهال كل كسب له موضة واقتلعها ولا عمهم اكيد به لحية ارجال كل يمينه للمراجل دفعها وضحت لك ماكان في الصدر يجتال ياتاج راسي يامقر لسنعها

ثم بعد ذلك قصيدة للشاعر ابراهيم حمود النجيدي قال فيها

للذوق لمسه لونة واقع الكون لاجرودها من صدوف السوادي والعمر لوحة والرسم فيه مجنون من فرشة يكثر شعرها عنادي مايجتمع وسط السما شمس وامزون لو كان دمج اللون للوقت عادي ترى الجنون اليا رضى وقتك افنون عين الرضا تنسى جميع المبادي لو كان به ناس كليلة يعيون هذاك سمته الحداثات غادي صارت اجذوره فوق والورد مدفون ماعاد تفرق بين هرم وكادي الوقت مثل السوق ناسه يبيعون وبه ناس تشري لو ثمنها يزادي والناس تال الوقت ما عاد يبكون لو الجروح اللي غشتهم اشدادي والحب كذبه لونة واقع الكون والكون كله صار لونه رمادي

ثم بعد ذلك جاء دور النصح للشاعر سليمان الرحيلي والذي قال في قصيدته

حقيقة قالوا العراف قبلي مقام الحر تكفيه الاشاره وازف الكل سامع لي وصية اقول الطيب زاود في مهاره وحاول تكسبه مهما تطلب تعيش ابعز مرفوع جداره تعلم يافتى وانته تدرب ترى الفلاح ياكل من ثماره واقول الكل سامع لايحلل كلامي حسب رايه واختياره لاني شفت من حولي غرايب تهيل العقل وازيد ابتهاره

الى ان قال

نظرت الناس بالاعمال تجري وضاع الوصل من قطع الزياره ولقيت القول زايد بالمجالس ولاغير مروح عن مساره وقول ابلا فعل يصبح مهانه على راعيه ويقل اعتباره حقيقة واضحة ماهي خفيه وضرب السيف يبقاله جساره واذا شفت الخطيه من رفيقي انبه كاش من دون استعاره ولاقفي واحط القيظ فيه بلا تعديل للوقت وغياره

ثم تلا ذلك القصيد في الوطن والذي يستحق منا الكثير وذلك في قصيدة للشاعر دعيكان المري والتي منها هذه الابيات

مبداي باسم اللي له العالم اسجود اللي يعبده كل انسه وجانه الواحد اللي للمخاليق معبود رب تعالى جل اسمه وشانه لامن بقيت القاف مابدعه ابكود ولاصار ماجوب زان ابدعانه ادري على قافي يجي فيه منقود لامر له عقال وقت اسمعانه بمناسبة قرن من الوقت معدود على البلد واللي مأسس كيانه زعيمنا اللي ماكر الطيب والجود لم الشتات وشال حمل الامانه سلام ياارض طاهره ياثرى العود اللي بها رجل نعجز اوصفانه يسقيك همال بلا برق ورعود ارض بها عبدالعزيز ومكانه ابها الزعيم اللي تسلسل من اسود زعيم اعظم من ولد في زمانه على الكرم والطيب والعز مولود ماهوب منهو عاش نفسه جبانه يوم الجزيرة كانت ارمال وحيود وتمره وشربة ما وصعب القيانه

ثم قصيده وطنيه ايضا للشاعر سعدون الشمري والذي تألق فيها

مملكتنا شعبها ذخر وسند والوطن وان قلت سابك وش يصير هي بلدنا هي سعدنا والوعد والتجارب علمت حتى الصغير شاقني ياناس حبي للبلد من يلوم القلب في حب العشير والبلد ياهل البلد روح وجسد ولاتموت النفس من دون المصير يوم سابك والتشابك والجلد السعودي اثبت الواقع بخير والله انك ياوطن غالي بعد من حدود الشام لين اقصى عسير بالجبيل اطناب وفي ينبع وتد والمسيره قادها راعي المسير كم نشارك كم نبارك للولد وش نقول اليوم يالجمع الغفير اجتمعنا في الرجال اهل العهد من رئيس من صغير ومن كبير جابني للحفل ابو محمد سعد والرجال الوافيه خيره كثير والسموحه كان في المعنى جهد كثرتي واقول هذا وستخير مملكتنا شعبها ذخر وسند والوطن وان قلت سابك وش يصير

وتلاها قصيده وطنية للشاعر عيسى الخاطر وذلك في الذكرى المئوية لتأسيس المملكة ويقول فيها

زاح الظلام وبينت ذيك لنوار وغطت سما دار بها العز قايم اخضر عشب القاع وتفتح ازهار والجهل زال ولابقى له رسايم استبشرت نجد بحلال لعسار ورقصت فرح في ضل وافي الذمايم دار بناها رايع الطيب والكار عبدالعزيز اللي كبير العزايم نسل الحرار امطوغ كل بيطار عون لمن صابه من الوقت ظايم اسس معالم دولته ابعزم واصرار وخل لها صيت وذكر وعلايم حمى بلاده ضد عبثين واشرار ابا بحزم وشده ولايعرف الهزايم في حنكته حاروا بعيدين لنظار وكل عرف مقدار راعي العظايم صيته شهر وانذاع في كل لقطار شيخ مشى بالطيب وللعز رايم قبله جميع الناس في خوف وامرار وعقبه امان وخير وعز ونعايم

وبعدها عاد دور الغزل في قصيدة للشاعر سعد الحربي

يانور عيني لاتسبب وفاتي وانته ملكة القلب والعمر والروح انته شريكي في توالي حياتي تامروتنهى وان تغليت مسموح دورت في كل الديار امنياتي حيث ان لي نظره مع الناس وشبوح لين ان فكري راح كله شتاتي ما شفت لي رغبه ولاشفت مصلوح وعقب البطا وايامي المرمساتي جيت ادفع الخطوه شقا وين ما اروح ساكت ويم الناس قل التفاتي ابقى النصيب اللي كتب لي على اللوح صدفه لقيت اللي تمكن بذاتي اللي بنى في مهجتي بيت وصروح قال اعترف لي قلت شي ثباتي حب الشرف ماهي سواليف ومزوح استيسرني سودك الناعساتي اللي بهن ود وغرابيل وجروح ارجف لهن قلبي دقايق وماتي بين الهدب والوجنة اللي لها ضوح علي حبك مثل سيف الزناتي القاتل اللي من تحجاه مذبوح

ثم قصيدة للشاعر حمد الخالدي قال فيها

خانت مجاديف الزمن واللي بقا جرح عطيب كل الامور الكايده صارت علي متكاتفه انوح ما حولي بشر ويزيد مع نوحي نحيب ابي اقاوم ماجرى وتيار وجدي جارفه طبعي غريب ابدنيتي وامشي بها كني غريب انسان في قلبي وفا واحمل شعور وعاطفه اضن به غيري بكا من لوعة الوقت العجيب يامن عينه ناظرت رسم السنين التالفه اخلاقنا املونه حنت على حال الصحيب دايم تجود ابخيرها مهما تكون السالفه اتشوفها بيدينها لصاح مظلوم وطليب تاقف بوجه المعتدي وارواحها متحالفه يقطعك ياوقت غدى بيدين شاه بجلد ذيب تركض ورا لفحة هوى والقيض ريحه ناشفه ماعندها كود الحكي وبقلوبها حقد وريب وشلي ابناس طبعها عن طبع روحي مخالفه في ذمتي ذقت القهر ولاجا في وجهي نصيب وش لي بحياة حظها ماجاد وقت العاصفه

وقبل الختام ألح الحضور بالطلب من مدير الامسية ان يشارك بقصيدة من قصائده وبالفعل استجاب لرغبة الحضور وقال هذه القصيدة

تنفس الصبح رايق والحلو رايق والشمس فلة ملاثم نور الاشراقي الشمس من فوق حد الافق تتوايق وترقب بقايا ظلام بالفضا باقي نسايم الصبح تعزف لحنها الشايق سعف النخيل لاتباكى يركض الساقي والطير غرد يردد لحنه الشايق للصبح للنور للتغريد مشتاقي يسعد صباحك عيوناً سحرها فايق جفن يضمه انفاس وجفن متشاقي البارحه ياحبيبي خاطري ضايق هم عثى بالضلوع ونان باعماق بيني وبين السعاده والفرح عايق ينثر يزود همي ويكبر فيني ارهاقي وين انت تلمس جروح القلب وتهايق تلقى في ضلوع صدري عرشك الراقي يسوقني في طريق الحب لك سايق اجيك مشتاق وانت اذنوبك افراقي

وبهذه القصيدة انتهت الامسية وقد اعرب الحضور عن بالغ سرورهم لما شاهدوه وسمعوه من قبل الشعراء كما تمنوا ان تكرر مثل هذه الامسية بالجبيل الصناعية وان يكون هذا الملتقى انطلاقا لملتقيات اخرى تضم عددا من الشعراء ويأتي هذا الشعور من حرص الحضور على متابعة الشعر والشعراء واهتمامهم الكبير والملحوظ يظهر من خلال هذا التجمع المنقطع النظير,