النور غاب ومابقى في السما نور
يوم المنايا وارت النور يدها
عساك ياعمي مع العين والحور
عساك تشرب من منابع شهدها
رحلت لله عالمٍ كل مستور
رحلت عن زيف الحياة ولفدها
كلٍ نعاك كبار وصغار وبزور
لك قبلةٍ ياعم كلٍ فقدها
ياجعل قبرك ينبت ورود وزهور
وتشوف روضات الجنان بلحدها
وياجعل عينٍ مابكت تفقد النور
تفقد عوانيها وتنعى ولدها
يادار مافيك الاشقى وضيقة صدور
مدري متى يادار يرحل نكدها
ياعين انا ياعين مانيب معذور
ياعين هلّي دمعها مع رمدها
ياعم من عقبك لنا يبدي الشور
من يسند العوجا ويصلح فسدها
جعل النسيم اللي به الشيخ مقبور
يسقيه ربي من سحايب رعدها
كل ارض رجل مامشت فوقها بور
تابس مرابعها ويقفي بردها
في الخير لك ياعمي انهار وبحور
محدٍ قدر ياعم يحصي مددها
وفي الخير ياعمي لك عروق وجذور
وردت غدرانٍ محد قد وردها
رحلت وافي ماحصل منك قصور
ياحر عين المبتلي ياكمدها
بعض الخيام ولو بني حولها سور
تطيح لا من طاح عالي عمدها
بنيت لك بقلوبنا خيام وقصور
ياساسها يانورها ياوتدها
لك في الكرم نيرات وجمال وقدور
ماتنطفي نيران عمي وقدها
اعذب كلام اللي على لسانك يدور
لاقلت كلمة ودي اقول عدها
حكم السما مافيه ظلمٍ ولاجور
لاجا القدر بانت خوافي عقدها
الله من نارٍ وسط قلبي تفور
شبت وهبت يوم قفّى سندها
مثلك ترى يامبارك الحال مخطور
من يوم ماتت سلوتي في مهدها
الله على الاقدار تفجع بلا شور
تسرق من عيون البرايا سعدها
الشمس غابت,, مابقى في السما نور
يوم المنايا طالت البدر يدها
