لا حول لاقوة وللحرف وكتاب
لا حلم لاهقوه ولاناس غالين
لاذوق لا معنى ولا عشق واحباب
يستاهل اللي فات والحاضر الشين!!
الله كريم وكل موقف له اسباب
الخير واجد والنشامى كثيرين
قبلك انا عانيت من هجر الاصحاب
الدمع فاض وغاض دم الشرايين
اغلاهم اللي في عيوني ولا غاب
يوم انها ضاقت بي الخطوة سنين
ما جيتهم شاري ولاجيت جلاب؟!
يقطع كفوف ما بها للعسر لين
مابي لاحد منَّه ولا بي لاحد ناب
لعيونهم كان النشامى عزيزين!!
جيت الحبيب اللي يبي عطر الاحباب
ابي الغلا والملح والظل والزين
جيت الغريب اللي طوى عهد الاغراب
وجيت القريب اللي اربوعه حشيمين
بعض الخواطر وان حسبنا لهاحساب
تفرش لها الواجب وظل القوانين
بين البحر والبر والريح والباب
مابه امان يحطم اليأس والبين
العين تنخاني على طرد الاسباب
والقلب ضايق والمواجع براكين
يوم اتذكر وش كثر خاطري طاب
يوم اتهجا وش تقول العناوين
كل الوجوه الوافية صارت اجناب
عجزت افرق بينهم حد الاثنين!!
هذا أنا ما بين صادق وكذاب
تعبت اعاني غربة الخاطر الزين
لو تدعي وانا ادعي غدر الاصحاب
مابه دليل ولا عليهم براهين
