ان كان باق في عيونك سواليف

تفضلي هليه مابه كلافه

على بساط العشق بين المواليف

ياغاليه هاتيه لأدنى مسافه

غيمة حنان,,ساقها الله على الريف

والقاع غنا للمطر يوم شافه

كل المراكب لارست بك على السيف

تفضلي في قلب يسكن ضفافه

ياساكنه فالجوف رغم العواصيف

ياشامخه مثل الجبل عن فيافه

لحظة حنان ما تبي منك تسويف

بوحي بسدك وادفني بي رفافه

أنا عشقتك عشق يكرم عن الزيف

عشق على وضحا النقا والنظافه

ياساكنه ما بين حدب معاكيف

على غلاك القلب زاد التفافه

يا ملونه قلبي على رسمة الطيف

بألوان قوس تكتسيها اللطافه

هلي سواليفك ولابه تحاسيف

لأن الصراحه من طبوع الولافه

وأنا اعرفيني جيت يمك على الكيف

وانسان غيرك كل روحي تعافه

حبك بقلبي ما يجيبه محاريف

عين فراش له والأخرى لحافه

والى التفت وشفت بعض الملاقيف

أيقنت بعض الناس عقله ضعافه

كم حاسد يسعى بكل التصاريف

ما أخذه على قلوب المحبين رافه

على النميمه بس نومه تناتيف

يسهر وهو ما بين سمعه وشافه

ترجع خيوله كل ليله مناكيف

ولا يجني الحساد كود الحسافه

تفضلي والقلب في حكمة الضيف

قلب يهلي بالغلا لا استضافه

وعيشي بعيده يا جميله عن الحيف

بقلب يوثق حبكم باعترافه

وان كان جهزتي السوالف بتكييف

هلي الكلام ولا يجيبك شفافه