هيا افرحي لا تجرحي فرحة العيد

دامت ليالينا بالافراح دايم

طشي لنا عطر البهاء والزغاريد

من طوّل الغيبات جاب الغنايم

كم قالها غيري امرار وتراديد

من خوف لا يلحقني اللوم لايم

الله وأنا ساله يفك من القيد

يا مقيده,, حظك مع العيد نايم

ياكثر ما اغليتك, وياكثر ما ازيد

في الحب لين اصبحت عاشق وهايم

ليتك وفيتي مثل علياء لا ابوزيد

يوم الوفا,, ما بين بايع وسايم

يوم أرسم النظرة,, من ابعيد, لبعيد

واقطع طريق مروجين النمايم

اللي لهم في كسر الأفراح,, اماجيد

أهل الحكايا مذهبين الولايم

شلة طفيليين!! مدري مقاريد

ابليس قاردهم العين الرسايم

من دونهم صكيت,, باب المناقيد

لا يلحقونك سبهم والشتايم

واليوم!! عندك فرصة اتلى المواعيد

هات الغنايم يا قوي العزايم