إيه أمس كنت أقول للأخ هيمة ان البني آدم عندنا هنا ذكي جداً ويتكيف مع أي بيئة حقيقية أو افتراضية,, وطبيعي جداً الأحوال اللي شاف عليها ربعنا في دبي، وبالعكس أنا اعتبرها ميزة مالي نقيصة فقط لانك تعرف البني آدم اللي عندنا على حقيقته بدون تمثيل وتصنّع,, طبعا الأخ هيمة يقول فعلا ان الاخ المخرج الاماراتي العبدول عرض عليه إنشاء شركة لاستقطاب الشباب السعودي للانشط الفنية المساندة وخصوصا مواهب الرقص والاصوات والذاكرة الغنائية المتقدة اللي ممكن تخدم اتعس مطرب في الحفلات وتشعلل الدنيا أكشن,, ويعتقد هيمة ان هذه المهارات الترقيعية اللي اظهروها شبابنا في حفلات دبي والبحرين من قبل مع أحلام وابو شعيل من زمان هو يعرف عنها خصوصا انه من مرتادي الاستراحات والمخيمات الشبابية في البرّان عندنا,, لا ويراهن الرجل مع كل امتعاضة من الحركات الصبيانية القرعاء اللي كانت تظهر عفوية من بعض ربعنا في اوج هيجانهم المسرحي او عفواً انفعالهم الفني خلينا نقول احسن، أقول يرى الرجل ان المستقبل امامنا فيما لو نفذ فعلا مشروعه الجريء مع سهيل العبدول وعملوا جوينت فينثر لاستقطاب هالبشرية الضاربة لقيادة الحركة التصحيحية للعناصر الخليجية في الفنون,, أحسن من شغلة الكبت والانتقاد اللاذعة اللي قاعدين انا وأمثالي من فعاليات المجتمع نمارسها على هالشباب الطيّوب المتعدد المهارات,, طبعا اللي مثلي محافظ للاسف وعنده شوية مبادئ تتعب في الحياة ما ممكن يستوعب كلام سوقي مثل هذا من الاخ عبدول يخليه ربي ولا من خويّنا هيمة ورهاناته الضاربة بعض الاحيان، لسبب بسيط اني ضد أي سلوك شين يسيء للمواطن في هذه البلد,, ودائم افكر في اساليب الحجرُ اكثر من اي اساليب تأهيلية او تربوية لما توصل الامور لبني ادم ضارب دماغه يحكم الجهل او المراهقة المعروفة أو المتأخرة انه يرسم في رؤوس العالم صورة مشوهة عن البلد وأهلها,, صدقوني الود ودي ان شركة الاتصالات تفكر في طريقة بالتعاون مع الاخوة مشردي الفضائيات من المحيط للخليج لحجب اي مكالمة على الهواء من النوع الماسخ من ربعنا اللي تصدر لفنانات او مقدمات صواريخ او فنانين من عينة الشباب الحلوين قوى اللي مدوخين البنات حيل خصوصا,, حتى شغلة الموبايل والوله عليه لدرجة ان البني ادم ما يقدر يتحمل رحلة 60 دقيقة من جدة للرياض او العكس وكأن الواحد فيهم بروكر في البورصة او رجل مال وعمال لازم يكون على اتصال بالسوق لحظة بلحظة,.
يا جماعة قبل امس بس عرفنا الجوال وكان البني ادم فينا طبيعي ولا يكلف خاطره يكلم على الحبايب لحظة بلحظة: يالله انا ركبت الباص، يالله احنا الآن ندلف للطائرة مع شوية السواليف الوصفية البايخة مع الطرف الآخر وهكذا دواليك,, ولعلي اقترح على الأخ يعرب بالخير مدير علاقات السعودية التفكير جديا في احداث فرق مدربة تدريب قتالي عالي يكون افرادها ضمن طاقم الطائرة لتأديب كل بني ادم يفكر يطلّع جوّال من جيبه,, وبكرة أكمل إذا ربنا سهَّل,.