شفت الندى سيله كما دمعت صبي

والرعد يضحك والسحايب تمره

وشفت الفضا والبر والثالث الضي

في قوس عينك شفت كنز المجره

وشفت المطر والبرق فرحة هل الحي

مثل الوعد ون مر بالقلب سره

شف دعوتي والناس ترحل وتدعي

انك علينا بالوعد ما تشره

ساعة ينام الليل والفجر يصحي

وصبحك تنفس عطرك اللي يمره

ارجوك يا شمس الضحى عطني الفي

ولا من قصر ظلك بساطي أجره

ومغيب شمسك لهفة تلتفت لي

وترقد بحضن الليل له دره

وغمض عيون وسطها الدمع يغلي

يا بو العيون اللي نضرها مضره

ارحم جريح ما شكا لك ولا شي

وانت السبب بجروحه المستمره

تليت قلبه تلت الدلو بالطي

ومع تلته قطعت كل الأزره

يا للي دفنت الحال واقف وانا حي

ليش الكفن من فوق جسمي تفره

كانك على دفن الوفا سامع شي

اطحن دقيقك بالرحى لا تذره

لا تستمتع للناس عاذل وواشي

اللي وشى بي قد وشى فيك مره

ووصيتي من هاجسي دام انا حي

ان مت موتي منك مالك مبره