يا الله يا واحد نرجيه ونخافه

ونعظمه من صميم القلب تعظيمي

قال الحبابي بدا في راس مشرافه

ارقاه لا صار بي ضيقه وتكتيمي

واخترت قافي الى كلٍ نظم قافه

مضمونه الصدق ما قلته بتوهيمي

انا مريضٍ وطب القلب واسعافه

ناخذ مع الزين سجّات وتعاليمي

يا غصن موزٍ يشوّقني تغطرافه

ما له مثيل ولو شبّه على الريمي

اغليه بالحيل واهني لمن شافه

وافرح الى شفته ويفرح بتكليمي

جعل المخايل تجي واديه واضفافه

ينشي رعدها بزخّات من الغيمي

هني من ساعده حظه على اهدافه

ما هو بمثلي شربت بمشرب الهيمي

حظى رفض مطلبي واعلن توقافه

لولا الحيا كان بكتب فيه تعميمي

واليوم ما عاد لي غير التحسافه

والكامل الله وبصبر للمقاسيمي