آه من حلم ترجيت تحقيقه وضاع

بين يوم وليل وأنا انتظر وقت طويل

ادري ان الوقت عقب اللقاء فيه انقطاع

بس والله ما حسب ان التلاقي مستحيل

آه من جرح تجدد بعد طول الصراع

وسط قلبٍ بالمحبة نقل حملٍ ثقيل

آه من كثراه والاه سبب لي صداع

اتوجد والتوجد اثر ما به حصيل

يا وجودي وجد من تاه بديار السباع

بالخلا ظلّم به الليل ما عنده دليل

شاف سبع سباع تقنب تقانيب الجياع

مع غروب الشمس واستسلم لقرب الرحيل

والله انه ما يقاوم ولو طبعة شجاع

ما معه كود العصا في يدينه والصميل

استدارن حول زوله ووقف ما استطاع

الفرار ووقف وصار مستسلم ذليل

آسرنه واسدحنه كما سدح الرباع

واللهمنة في ثواني ولا كفى قليل

اتوجد شوف خل رماني بالوساع

العيون اللي هدبهن على المحجر ضليل

من بياضه كن في وجهه المشرق شعاع

ومن جمال الجسم لا هو متين ولا نحيل

كمله بالزين رب بما يأمر مطاع

لا مره استسلم إسماعيل وأباه الخليل

قلبي اللي فيه من لوعه الحب اللتياع

وكبدي اللي كن فيها حرارة زنجبيل

صابراً صبرٍ تعدى حدود المستطاع

رغم طول الوقت ما جاء بقلبي له بديل

لو يغيب ايام وشهور وسنين تباع

والله إني ما قدر انساه منسوع الجديل

علموه ان كان جيتوه يلزمه اطلاع

حالة اللي يبغي الجدي ويرده سهيل

الجريح اللي يبي الوصل لكن ما استطاع

ينتظر يوم الفرج لو صبر وقت طويل