الشعر توه زان ميه امّيه
مية فخر ومية ذكر واف الأشبار
ذكرى البطل اللي عزومه قويه
اللي على صعبات الأيام صبار
عبدالعزيز اللي أذكاره طريه
قديمها وجديدها فخر الأقطار
نجد الفخر من قبل حكمة رديه
يطمع بها الخايب يبي موتة الدار
فيها العطش والجوع ونفوسٍ دنيه
تصيح وتنخا صابها الحزن تكرار
تنخا موارث ناطحين السريه
الموت ما يطري عليهم والاخطار
تنخا هل العوجاء ونفسه شهيه
تبي موارث شبلها راعي الكار
من الشرق جاها راعي الخير حيه
قامت تزغرد بصوتها وصوتها حار
تبذل له الترحيب بصوت وتحيه
تبي تضم اللي يحميها من العار
تبسمت بسنونها مع شفيه
تقول وينك يا ذراء الدار والجار
طولت يا راع الدروب النقيه
قال ابشري ألفيت في حسن الأفكار
أما حياةٍ عز ولا منيه
أهجم على العدوان وبالكف بتار
حكم الولي عندي وسنة نبيه
درست حكم الشرع ماني بغدار
درست انا القرآن وحقٍ عليه
حقٍ علي أحكم وللشرع نشار
من قبل أبوتركي أسنوعه شقيه
الظلم فيها يلحق الجار والمار
نهب ونهيب وحالة الدار سيه
يأسف لها المسطور من واهج النار
فيها البلاوي والمشاكل نشيه
ينشي لها الظالم وبالظلم جبار
الفقر فيه مشمرٍ عن يديه
متمركز فيها وفيها القحط صار
مزارعه وابيارها مهمهيه
يا عزتي للي زرع بعض الأشجار
يبي الغناه وضيع المال طيه
اصبح حزين البال من قو الإعسار
والخوف فيها دار فوق المطيه
يا كثر صدفات البلاوي والأشرار
وجاها حكيم الراي راع العبيه
عبدالعزيز اللي للأمجاد دوار
قال ابشري بالعز والمقدريه
استبشري يا نجد في خير الاقدار
ركب الكحيله حافظ حسن نيه
والسيف في يمناه حكيم الأمار
خاض المعارك دارس للقضيه
الدار لجداده والأيام تندار
حاكم ومن حكام راع الحميه
عقله رزين وبالحدب ياخذ الثار
قضى على الحساد والجاهليه
بالعدل والتمييز يفهم بالاشار
حمى حدوده حر ماهو هفيه
من ساس قومٍ بالمهمات عبار
وصار الخوي يأمن وينصح خويه
تبدلت احوالهم بحسن تعبار
ساواه ابوتركي عن ضيم وزريه
يشهد له الله والمخاليق حظار
وتشهد اجبال عسير وتشهد طميه
ويشهد له التاريخ في كل الأخبار
أسس قواعدها بعدل وجريه
جرى على الصعبات وللحكم صقار
الحر فيها اعتدل صار فيه
وكثرة مزراعها وكثرة الأبيار
كثرة ابيار الخير حلوه عذيه
والأمن ساد الدار من حكم الاحرار
ويشهد بعيد الناس ويشهد دنيه
ويشهد كبير العمر ويشهد له اصغار
وتشهد منيفه والكحيله سويه
مع الصويتيه لهن ترفع اشعار
الكل منهن بالمعارك رهيه
اخيول اصايل فوقهن شيخ قهار
يقهر عدوه ويخلفه عن نويه
معروف ابوتركي على الموت جسار
متوكل على عزيز البريه
الواحد المعبود خلاق الابشار
هذه اخبار اللي اسراره خفيه
معروف ما يبدي خفيات الاسرار
مرحوم يا راع الشرف والدهيه
عساه في جنة هل الخلد حظار
في جنة الفردوس يجني أحليه
آمين يا عله مع هل الخلد الأبرار
عساه مع الأبرار في كل جيه
يجنا من الجنه حسينات الأثمار
لعل ما يعرض على نار حيه
في جاه معبود عن الذنب غفار
والحور من فضل الولي له هديه
آمين يا عله دايم الدوم يختار
عساه في ظل الولي مع نبيه
يوم أن شمس الله تقدر بالامتار
آمين ياالمعبود عال البهيه
عساه دايم حول حوضه والانهار
يا رب لا تعذب سليم الهويه
مسلم ومؤمن ما يجازا بالإنكار
رسّا قواعدها وعطاها عطيه
عطاه لسعود البطل حر شهار
وسعود من حكام ما هو نزيه
من صلب عود بالفخر دش الابحار
حكم بشرع الله في كل هيه
يعطي احقوق الناس في كل تدبار
من والده خذا الافكار الذكيه
ما يجهله الحكم صليب الاشوار
طير السعد سعود حام الونيه
اللي على الشدات ياطا على الحار
ومن بعد سعود اخوه فيصل حضيه
فيصل سليم الرأي من صلب الأخيار
عنده خطط وأفكاره العالميه
خوف بها إسرائيل يوم الدخن ثار
القدس للإسلام أرضه أبيه
قاله حكيم الرأي صوره مع إقرار
فيصل خضعت له كل دوله غنيه
يحكم بشرع الله والفكر تيار
حلحيل راوي بالأفكار الرويه
زعيم صاحي يفتل الذكر بأذكار
من ساس قوم للزعامه ضريه
خيالة العوجاء صواريم سنجار
قضى على التسويف والعنصريه
حاكم سياسي للصعيبات عمار
وخالد بعد فيصل حفظ الرعيه
ما ضيعه في كل همه ومشوار
مؤمن وحاكم ما خذاها رشيه
خذاه من ساس الحكم عال الأسوار
خذاه ورث اجداد ما هي شريه
ما هي بحب خشوم بالسيف واجبار
حاكم عطوف وللوازم دعيه
حلال صعبات المشاكل ليثار
وفهد حكم بالعدل عن الجاهليه
يحمي احماها ليا غشا جوها غبار
معروف أبوفيصل أفكاره قويه
زعيم محنك بالسياسة ليا شار
ليا وعد يافي بقطع النسيه
وليا عفاء كن الذي صار ما صار
حمى ارضها وسماه والجاذبيه
والسفن ترسي في عميقات الإبحار
خادم لبيوت الحرم عن الأذيه
ما يدخله خاين وفاسق وكفار
وسع بيوت الله ونفسه رضيه
من حر ماله يدفع الكاش مليار
من حر ماله ما خذاها عريه
من ورث والد آخذه والابن بار
حط المزارع ومن البحر صار ريه
تشهد له العالم وللشعب نصار
التحلية للشعب صارت نقيه
في كل بيتٍ داخله ما به امرار
وبنوك تسليف العقار المديه
حطه ابوفيصل لشعبه بالإيسار
اللي سكن فله واللي قيصريه
من فضل ابوفيصل رقينا للأقمار
طور مصانعها زعيم الجهيه
اللي توجه به دول كل الأمصار
واحيا تراث أجداده الاوليه
الهجن وخيولٍ اصايل ومضمار
ولو ابعدد ما كملت الحصيه
من المستحيل أحصي أفعاله بالاشعار
فعايله إكثار ما هي شويه
أزريت أحصيها نبت وورود وأزهار
فعايل الضرغام ماهي هبية
منها استفاد الشعب بالسر وجهار
ياعل ابو فيصل ايامه رهيه
آمين جعل ايام ابوفيصل إكثار
راع العقل والفكر والغايريه
معروف أبوفيصل على شعبه يغار
يا عل حسناته ما يجي به خطيه
عسى حسناته عند ربه بتكرار
وعضيده الضرغام افعاله مليه
بالعقل والتمييز للخير سهار
شبل الأسد عضد الفهد هو وليه
عبدالله اللي للصعيبات مسفار
عز البلد بعد الفهد للبليه
ليا بلتنا الخلق ياقف بالانحار
ولي عهد ريس حرس له تحيه
الشعب يرفع له تحيه ليغار
والنائب الثاني فعوله نهيه
مثل النداوي لبرق لريش عفار
مخالبه من قو صيده دميه
حر أقنصبه بعد طيحات الأمطار
قائد لجيش العز والشوشليه
سلطان وقت الحرب قائد للأخطار
يعيش أبوخالد أفعوله حفيه
للطيب والنخوات معروف بصخار
ونايف وزير العز والداخليه
قائد أمن عز الأمن للفخر سار
بمن الدول حلفت ما شفت زيه
حكيم رأي وللعدو دوم كسار
وسلمان أمير الرياض ادروبه زكيه
أبواليتامى وللضعيفين صبار
امير نجد اللي يحل القضيه
يحلها بالعقل وللشعب ستار
أبوفهد دايم للأمجاد غيه
غاية شريف وشهم للمال هدار
واحمد حميد الفكر عن كل سيه
عضيد نايف حر والحر مهار
احمد عزيز النفس شبل السميه
سليم رأي وللمهمات يندار
وكل آل سعود اسود يعجب مجيه
نفخر بهم في كل لحظة ومعبار
أنهيت ميه واختمه في نبيه
صلوا على الرسول يشفع للأبشار
