كان المرض والجهل والجوع والبين
بشبه الجزيرة سايد واكتساها
ناس تموت وناس موتى وحيين
هذاك يدفن وذيك تبكي ضناها
وكان التفرق والنهب منتشر بين
سكانها واللي بحجه نواها
عقيد قوم وبيرق مع نياشين
وصفة جموع معه ترجي عشاها
الجار يغزا والمحاصيل شاتين
او خلفة تسقم بيوت وراها
ولا لاح بالسماء جوك ناصين
كل يدور الحيا في ثراها
هذاك حال اهل الجزيرة المساكين
يوم المؤسس مهرته اعتلاها
يبي يلم اشتات عجز وضعافين
ويرد دوله جد جده بناها
توجهوا بظهور الامهار عجلين
ويا كم ليله ابو تركي سراها
اول محطة للموحد بيبرين
يوم انطلق من الكويت وغزاها
بعض القرايب والرفايق وستين
يوم الموحد للجزيرة نواها
تفرقوا تقسموا والهدف وين
المصمك اللي سعدها اليوم جاها
عند الركاب وبالمزارع وبالطين
المعركة كل نواها ورجاها
المصمك النية ومع الفجر ناوين
والشلفا اللي في جداره حواها
وارسي المؤسس دولة الحق والدين
وناس من الضيعة سترها وحماها
وخلف لنا حكام بالحق صلفين
امن وامان منتشر في سماها
الله يديم الحكيم يارب آمين
وتبارك لنا في عيدها وتحماها
