إعداد : خالد عبدالله البدراني
عنيزة
الشاعر سليمان عبدالله السلامة برز في كتابة الأغنية الوطنية والعاطفية، تعاون مع العديد من الفنانين ومنهم الفنان الكبير محمد عبده والفنان سلامة العبدالله والفنان الطيار والفنان السابق عبدالله الصريخ وفهد العبدالله وصالح الضاحي وغيرهم، شاعر يعشق الفكرة الجديدة ويقدمها باسلوبه السهل الممتنع كتب للوطن فنثر ابداعه الجميل بعدد من الاغاني الوطنية الجميلة فقال بأغنية شدا بها الفنان الكبير محمد عبده: -

يايمين الخير يايمنى فهد في ظلالك مستظلن هالبلد تزرعين الخير لأولاد الولد وطايل خيرك جميع المسلمين يايمين الخير في ليل ونهار تنصرين الدين في كل اقتدار في حرم مكة وطيبه لك عمار ومسجد الصخرة لقى منك الحنين يايمين الخير خيرك للجميع عم خيرك كل موطنا الوسيع الصحاري الظاميه صارت ربيع وازهرت بالخير رغتم الحاسدين يايمين الخير واصلتي العمل سكة التعليم حاربتي الجهل السعودي عانق الغيم ووصل للكواكب للفضا باقصر سنين

ويتواصل عشقه للوطن وقادته فيكتب مرحباً بزيارة صاحب السمو الملكي الامير سلطان بن عبدالعزيز الى منطقة القصيم هذه قصيده:-

غني قصيم الحب فرحة بسلطان يامرحبا ياأميرنا اللي نحبه ياممطر الفرحه بالأفراح هتان قاع الظما يزهر لشوفك محبه بارق سحابك فيه للخير عنوان حتى انه العامي يشوفه بقلبه للناس حطك والى العرش سلطان تارد مواريدن ليمناك عذبه في هالبلد كلن لك اولاد واخوان كلن يحبك وانت كلن تحبه

وللقصيم في نفسه مكانة خاصة نراها في هذه القصيدة التي تغنى بها الفنان سلامة العبدالله مطلعها:-

السعودية بلادي والأمل كل شبرن في ثراها لي محل كل شبرن فيه لي ربع واهل من جنوب الين اطراف الشمال بس انا لي بالغلى عشق قديم اعشق الايام بربوع القصيم الله اكبر كل ماهب النسيم فيك ياأرض المحبة والجمال

ومن قصائد الوطن الى تباريح الاشتياق وآهات الألم في هذه القصيدة التي هي أول ماكتب وتغنى بها الفنان السابق عبدالله الصريخ:-

شمس المحبة قربت للزوالي جاك البديل اللي لشوفته تشتاق نويت هجري يابعد كل غالي وين الزمان اللي مضى وين الاشواق هانت عليك ايامنا والليالي وانهيت ذاك الحب يازين بفراق

وينجلي نسيانه بذكري من يحب حينما يقف على أطلال ذكراه فيقول:-

قرب يطيب الجرح لولاي مريت على دروب ذكرتني بخلي وقفت حاير بين شوق وتناهيت قلبي ينوح ودمع عيني يهلي ابكي حبيب راح أقفى وانا اقفيت يومه على ذا الدرب فيني يهلي

وفي اجابة رائعة لتساؤل عذب ورقيق لمن هو يحب يقول:-

يقول وش زودي على الناس عندك واقول كلك ياهوى خاطري زود يقول وش بي للمحبة يشدك واقول مدري انشد عيونك السود

وأما تبادل النظرات وهمسات العيون لعشق قديم لاتزال تباريحه الدفينة تخالج اعماقه يقول:-

يامراسيل العيون الحايرات أنثري فوق الهدب موج الحنين رجعي شوق مع الأيام فات لاتقولين انتهت ذيك السنين توحبي ما بعد بالقلب مات والوفا والود باعماقي دفين

وأمام الفراق الذي هو لوعة كل عاشق صادق ينشر آهاته في تساؤل فيقول:-

تونا وين ياناوي تروح خلنا نفرح بشوفك تونا شوفتك لي هي دواء كل الجروع لاتسافر فيك قلبي ما اهتنا من يلوم اللي على خله ينوح توي ادري ويش حبك ويش انا

ورغم الفراق ومافي الخواطر من عتب يؤكد صادق حقيقة مشاعره تجاه من يحب في هذه القصيدة:-

يبقى الغلى لوفرقتنا المشاريه والشرهة اللي بالخواطر تروحي كل يعاتب بعض الأحيان غاليه والحب يبقى فوق كل الجروحي

وفي موقف وصفي وجميل يقول: -

يمطر لغيري من حنانك سحابك ويموت قلبي ظامي بين أياديك رجيت عطفك بس طال الرجا بك لين احترق بالياس كل الرجا فيك

وفي الرثاء كتب فجادت حروفه حزنا وتعبيرا عن الأسى فقال: -

لاعادك الله ياضحى اليوم الأسود يايوم فيك الله عليم بحالي ابكي ودمعي كل ماقلت هود زادت عباري خاطري ثم سالي مصيبتي بالقلب من صبري اكود عزي لحالي فيك مما جرالي

ونختتم وقفتنا السريعة هذه مع أحدث قصيدة كتبها يقول مطلعها : -

شفت السحاب ولامع البرق كايد أثر المطر ماهوب مع كل براق ظامي حنان ومن سنين شدايد على ربيع الود بالحيل مشتاق ياللي حناني لك بكل القصايد ضاع العمر لوعات واشواق وافراق

والى اللقاء مع وقفة اخرى وشاعر آخر،،،