يا قمة الفرحة هلابك هلابك
من صادق احساس يكنه خفوقي
زانت لنا الايام والرب جابك
عساك يا صالح على اسمك تفوقي
جدك سعد قدم لك اسم زهابك
صالح واسم صالح لمثلك يروقي
يصلحك ربي من بداية شبابك
وتوفي حقوق امك وتوفي حقوقي
والضيف والعاني لهم فك بابك
قدم لهم ما جوبهم والحقوقي
وربعك حزامك كان وقتك رمابك
فزعتك لاضاقت عليك الطروقي
لك ربع كل اعداك لازم تهابك
ورجل بلا ربع قليل الوفوقي
هاذي وصاتي حنكتك والرجابك
من بعد رب الكون محيي العروقي
وصاة ابوك اللي يبيلك ثوابك
عساك تسلم من جميع العقوقي
بالدين جود في يمينك كتابك
خلك مع المعبود صادق صدوقي
