ما لوم أبو محمد رفيقه ويبكيه
أمسى وحيد ميِّسٍ من وجوده
ويبكيه خالد والرفاقه واهاليه
وضلع العيينه صامتٍ من فقوده
نبكي فهد مشعل عسى الرب يذريه
في موقفٍ كل الخلايق تروده
له سيرةٍ حسنة وحسنه مساعيه
عون الصديق وصادقٍ في وعوده
نثني على الرجَّال لا حل طاريه
ابن الرجال اللي عريبه جدوده
لو جيت ابكتب كل جميلة حسانيه
حبر القلم ينشف وتتعب جهوده
يالله يا معبود عبدك تنجّيه
وتجعل سعة مد النظر في لحوده
وتجبر عزى اهله ومن كان يرجيه
وتجبر عزانا والدفاع وجنوده
وصلاة ربي عد ما الريح تذريه
على نبيٍ في المدينة نعوده
