معزتي من فوق أي اعتبارات

والله ما اطمّن هامتي من أجل بنت

لا تحسبين اللي مضى شيٍّ وفات

لا تحسبين اني شفيت وتحسنت

الحب الأول كله جروح وآهات

ياحب ليتك في الحشى ما تمكنت

الحب ليته يا شقى ناظري مات

ياليتني قبل ابتدي الحب هونت

بعض الغلى ما يطلب شهود واثبات

تقراه لا لاح الهدب ثم عاينت

وبعض الغلى يحتاج صكوك وشهادات

ما يكفي إنك في المحاجر توطنت

بيدك طمستي كل ذيك البدايات

وأنا احسب أني اللي على خافقك منت

دفنت ذكرى حبنا ضمن الأموات

وسجلت للذكرى قصيدي ودونت

في يوم كنتي ياوهم توأم الذات

ياليت ماكنتي وياليت ما كنت

لك يا زمن مني سلام وتحيات

يالعن ابو غيرك وش اللي انت زينت

طعنة ظهر ياخاينة جات بسكات

تهون ما دام انت ياراس ماهنت

والحمد لله يومها جت سلامات

صلّيت لله ركعتين وتسننت

ومعزتي من فوق أي اعتبارات

والله ما اطمّن هامتي من أجل بنت