ياهقوتي بعض الصداقات تلوى

حذفة عصى مهما بلغ مستواها

فيها ابتليت وشفت غيري تبلوى

والناس يفرق طيبها عن رداها

ياهقوتي نشره على طير شلوى

وإلا الردي نفرح الى أنه نساها

ما نلتفت له لو لوى بالف ملوى

النفس نرفع قدرها عن وطاها

باحساسنا صرح الكرامة تعلوى

فوق النجوم اللي بعيدٍ مداها

نشرب فناجيل الوفاء وانتحلوى

نشوم والزلات ندمحٍ خطاها

ياهقوتي عذبات الايام سلوى

مع صحبة اللي فيه نفسي تباها

صديق وقت الضيق مالاج والوى

يمناه يكفي عن قراها نباها

ما هو كما نذلٍ بدلوه تدلوى

يمشي على الحروه ويركض وراها

يكشف خفايا مذهبه رمح اللوى

ومن دور الغرات عنده لقاها

ياهقوتي بلواه بالحيل بلوى

اللي صداقاته لحاجه بناها

ياهقوتي بعض الصداقات تلوى

عجزت أميز وجهها من قفاها