في كل جمعة سنقف مع شعر المحاورة من خلال محاورة لشاعرين معروفين وفي هذا العدد نقدم محاورة بين الشاعرين الكبيرين احمد عبد الرحمن المغيولي وناصر بن سرحان الشيباني رحمهما الله - والتي جرت في محافظة عنيزة,.
حمد: والله انه على ما قيل فرصة ثمينة ليلة جمع الله به شيوخ القبايل من بغى الطيب يالله لا تحير يمينه والأصايل تباريها عيال الأصايل |
***
ناصر: قودها يا حمد سواة قود السفينة يا وسيع المعرفة لا تضيع القوايل كل رجال يدري وش تحوش يدينه وأنت راع الحساني وانت راع الجمايل |
***
حمد: يا الله انك تلحفنا جناح السكينة والمفكر يجنب عن خبيث الدغايل من بغى الخط يمشي والفضاء قدم عينه والجنايز على قبره تغز النصايل |
***
ناصر: لا تشغل مكينة ثم تطفي مكينة من هو اللي يبي يرمي بعوج الفتايل من هبط سوق مكة زار سوق المدينة يا حليل النشاما يا بسين البلايل |
***
حمد: كل سنٍ حلاته ينسجم مع سنينه والمعزة تراها مع عيال الحمايل إومر العين كان النفس عند فطينة وين خيال شقح معبسات الشمايل |
***
ناصر: يأهل المعرفة وشلون سبق الدخينة أنت ما تنتبه للسيل والسيل سايل كان مالك ضلوعٍ قاسيات ومتينة خلها للنشاما اللي تحب الصمايل |
***
حمد: جعلها ما تصيبك مثل راع الدفينه فاقدن مركز له بالثلاث الأوايل أدحر النفس والشيطان وأدفع قرينه وان بغيت الفعايل مع رجال الفعايل |
***
ناصر: أنت تبني على ما صار لبنه وطينه وين زرع زرعته بين رابغ وحايل من طمع بالهزيله ما طمع بالسمينة انت تركض على الخيال والليل طايل |
***
حمد: الجمل لا يخلط بالرغاء مع حنينه جعلها ما تعلك مرزمات المخايل أقشح الخبز لا يظهر فطورك عجينة ثم تظهر شماته بين قولٍ وقايل |
***
ناصر: يا حمد طول ليلك ما تعرف الرطينه انت خيال وحصانك يحب الدبايل مرت ايام دنيانا ولا هيب زينه والدقايق دقايق والجلايل جلايل |
***
حمد: كيف اعاف المعسل والتفت للشنينه والله انه عليه يا بن مشيب فشايل الطواحين تطحن ويش حاصل طحينه يا كبار المعاني يا كبار الهوايل |
علي بن عمر الخراشي
الدرعية
