لي نجمةٍ دايم وهي مسهرتني

ليلي واطالع نورها لين الاصباح

وكلما توهج نورها وهجتني

وعادت بي الذكرى على ماضي راح

ماضي لياليه القديمة طوتني

صفحة زمان ملونة عيد وافراح

رسمتها مع طفلةٍ عاشقتني

يوم الهوى شبك لنا الراح بالراح

وعشت بصفاها جنة يوم جتني

صارت ملاك القلب اسر ومفتاح

في بحرها الساحر شراع خذتني

مرسى وسكون وهي عواصيف ورياح

وياما وياما بليلها سفرتني

نسمات صيف بالشذى عطرها فاح

فردوستي اللي قلت انا خلدتني

تذكار صارت في حياتي ولازاح

بقصة غرام هي بطلها كتبتني

والحب بابطاله نهاياته جراح

نجمة ظلام ساهرة هيضتني

يشبه حبيبي نورها بعد وان لاح