لو يسألونك عن قصيدي وما اعنيه
باسم العنود استشهدي واكتفي به
بين انتظار ونار شوق ومشاريه
وامال واحلام بعيدة قريبة
لك اجمله لا وأنتي اجمل معانيه
مسكه وريحانه وورده وطيبه
وما يكتبونه لك,, لهم,, منهم أهديه!
وامدي لهم واللي تبين اكتبي به
واللي تمادى يكفي انك عرفتيه
لا تسالينه عن غباه آسفي به
امدي له اكثر وارفضيه وتمنيه
وتظاهري له بالغلا والعبي به
تجاهليه,, اغليه,, جيبيه,, وديه
انسيه حتى يحترق واحتفي به
به سافري لا قصى مدى التيه وامديه
في نار شوقه والفراق ولهيبه
قولي قصايد عشق على انها فيه
واستوقفيه وزيدي الشك ريبة
يقرأ القصيد بعكس ما انتي كتبتيه
ويدري بما تعنين,, لا مادري به
له جاملي ما دام هالحال ترضيه
ولا تسألينه ليه حاله غريبة؟