نشرنا في الاسبوع الماضي لغزاً كتبه الشاعر ناصر المسيميري ويقول

ويش الخوي اللي مدامه امخاويك ترتاح له واليا فقدته تضيقي خوي لوانه جمادٍ ايسليك وان راح منك اتذوق نفعه حقيقي

وقد توالت الحلول الصحيحة التالية:

يقول من قوله يبي صدق يرضيك ويحل لغزك ليت حلّه صديقي ناصر تراه ريال من بين أياديك ياما انتحى بي عن طريقه طريقي ادعي عسى ربي بالأيام يغنيك وبالآخرة تلقى غناك الحقيقي

بندر بن ضحيان المقاطي - الرياض
***

هذي تحياتي مع احلولي تجيك قلبي على ماقال ناصر يويقي المال يالرجال لاجاك يحييك عز الله انه خوش والله رفيقي

محمد الحميدي السيحاني
***

المال ستر الحال مافيه تشكيك لاشك فيه اللي يفوقه حقيقي كنز القناعه في جميع المساليك اكبر من اكنوز الذهب يارفيقي

خلف الاسيد الشراري
***

ناصر عليك الحق والحق يرضيك واللي ثبت حقه إلسانه طليقي وش السبب تسفه إمودٍ ايحاكيك خص الذي بالهرج ماهو يعيقي لاتعتذر لاهنت ماعاد يمديك زميل مهنه جار وايضا رفيقي البيجر إيجيبك او جوال بيديك وهاتفك صابه من سببنا حريقي ملكتهن لاشك مثل المساويك وبيني وبينك حال بعد او طريقي ياطيب قصدك على البيت ناتيك عندي خبر كني إبقلبك إمويقي علم الخوي عندي عن الكل يغنيك إريال بين الناس ماهو يليقي

فهد بن عقيل الطويان,, بريدة
***

يامرحبا بك جعل ربي يخليك ياواحد باللغز فكره عميقي ذاك الريال اللي عن الناس يغنيك يصير لك وقت النوايب رفيقي

مجاهد بن احمد العبدالمنعم - الزلفي
***

يامرحبا وهلين والله يحييك ترحيبة من واحد مايضيقي ياشاعر ماعرفك واسمع بطاريك بصمة يمينك بالكتاب الوثيقي الغاز وحلول المعاني تناجيك واسمك على طبعة كتابك حقيقي اسمه وموضوعه وطاريه يغنيك مثل (الريال) بعازته لك صديقي

صويلح بن عبيسان الشيباني - الرياض
***

ياناصر اليا سافرت الله يخليك اسمع نصيحة واحداً عقب ضيقي حافظ على أفلوسك غديها اتكفيك ترى الريال اليوم هو الصديقي

حمود مقبل الشراري
دومة الجندل
***

عبر الجزيرة نحل لغزك ونهديك ازكى تحيه يالاديب الرشيقي مادام عندك مال كل يحييك وكل يقول انت العزيز الصديقي وان قل قل اللي يعزك ويغليك لو أنت طيب ساس واصلك عريقي

عبدالله عايض الحربي
عرعر
***

يامرحبا ياناصر الله يحييك عداد مايفرح صديق بصديقي فرصة لنا تكتب وحنا نجاريك ياشاعرٍ معناه دائم عميقي عندك لسبك اللغز خطة وتكتيك عمله فريده ماكساها بريقي (المال) يرفع له رجالٍ صعاليك والسيل يحيي للهشيم السحيقي

موسم بن سفر القثامي
الطائف
***

مني تحيه باسم السلام احييك نجم المسيميري تسامى حقيقي اللغز حله يابن الجواد ياتيك ياللي تنشد من فريق لفريقي ان صاب ظني مال يكتب على الشيك وان خاب ماهو واقفٍ في طريقي

عبيد المطيري
عنيزة
***

يالغز ياللي كاملاً في معانيك وموقعه ناصر بمعنى دقيقي ذاك الريال اللي عن الفقر يحميك يانعم والله من خوي الرفيقي واخير منه اعمالك اللي تلاقيك في ماقفا يوم انتها الطريقي

حميدان الحميد البقمي
***

اللغز واضح دون ريبٍ وتشكيك عبر التراث ياصلك حله حقيقي المال بالدنيا يعزك ويغليك وتصيربه نعم الخوي والصديقي

محمد بن صالح المجاج التميمي - الرس
***

ياللي بدعت اللغز الله امحييك اللغز وارد وبالمعاني عميقي لك حاجةٍ بالسوق تشري مقاضيك والسلم في جيبي ترى هو رفيقي

حمدي فالح فليح الشراري
دومة الجندل
***

يامشرف الصفحة نبارك مساعيك عسى النجاح يحالفك بالطريقي المال حل اللغز مافيه تشكيك وانا اشهد ان قله يلد ويعيقي

محمد البوجان الشراري
الحديثة
***

يامشرف الصفحة عسى الله يحييك ويفتح لكم ربي لخيره طريقي انقل تحياتي عسى الرب ينجيك يوم الفزع من نار برده حريقي لناصر وقله الكرم من مباديك وبالطيب يربطكم سباط وثيقي قلة ترى قافي عن الحل ينبيك ريال كل له يوده صديقي

راشد بن ناصر الشقيق
الاسياح
***

ياناصر ارتحنا لاخافي معانيك حنا نعرف إجلالها والدقيقي هذا الريال اللى عن الناس يغنيك وليا فقدته تلتهب ماتليقي

رميزان فهد البقمي
الرياض
***

يامرحباً بك يالخوي زين طاريك دايم سواليفك ولغزك حقيقي وترى النظر نعمة مادامه مخاويك واليا خذاه اللي عطا لاتفيقي هذا مقدر والمقدر ترى يجيك واصبر على المكتوب لوما تطيقي

مبارك محمد الضعاوين
وادي الدواسر
***

ياقايل اللغز المخفى باهنيك واعطيك حله بس بالك تضيقي هذا الريال اللي على الدوم مرضيك في ساعة العسرات تلقى الصديقي كل الخلايق تشتقى له صواكيك والا فقدته صار نومك يفيقي اذا زهيته اسكتو لك عداويك واذا مسكته عاد نفعه عتيقي

فهد بن عبدالله الخرعان
الافلاج - ليلى
***

ترى الخوي معروف والله يحييك ومني التحية للعزيز الرفيقي المال معروف به الناس تغليك واليوم غير المال مالك صديقي

محمد بن عبدالعزيز الخنيفر
***

الله ياناصر على الخير يهديك ويدلني وياك لحسن الطريقي لغزك ريال تحمله في مخابيك ينفعك بوجوده وقله يعيقي

شجاع سلطان البقمي
الرياض
***

بركات قال المال عزك ويغنيك إيجلسك في مجلسن لك يليقي ليا كثر إريالك كثيرن ايماشيك كلن يقول انته إخويه صديقي

خالد صنهات الحربي
القصيم / البكيرية
***

المال يا ناصر سوى نقد او شيك وسيلةٍ للي يعرف الطريقي إذا صرفته وفق تشريع واليك ينفعك بالدنيا, وجوا المضيقي

مطلق الشراري
الرياض
***

اللي قصدت تلقاه دوم بمخابيك تحتاج له في وقت يسرٍ وضيقي الى فقدت المال كل يجافيك وان كان مالك زاد زاد الصديقي لاتنفقه فيما يضرك ويوذيك تجني علىنفسك وتحظى الطريقي

يحيى بن محمد الغفيلي
الرس
***

تراء الخوي اللي تقوله يسليك ذيك الفلوس ودوك علمٍ حقيقي إن زاد مالك قامت الناس ترجيك وكلٍ غدالك بالمجالس صديقي

مزعل محمد سمران الرشيدي
***

الى بغيت اتسافر احرص يخاويك مالٍ يفيد بالسفر يالرفيقي مالٍ يسدك يالسنافي ويغنيك عن منة العالم كلامٍ وثيقي هذا جواب اللغز طابت لياليك يالصاحب اللي كل قوه حقيقي

صالح عبيد التميمي
الرس
***

سر يا قلم وانا من القاف ابعطيك من شاعراً على القوافي شفيقي اللعز ياناصر يسجل علىشيك ذك الريال وكل مله صديقي

عبدالله خليف رشيد الجهني - حائل
***

اذهلتنا واسعدتنا في مباديك هذا التطور شاهدٍ لك حقيقي نشكر جهودك نشكر في مساعيك لاجلك حريصٍ بالتراث العريقي ولغزك ياناصر واضحٍ من معانيك ذاك الريال اللي بفقده تضيقي

محمد عبدالله العسكر الحنيني
البكيرية
***

ياللي كتبت اللغز ربي يحييك لو إن لغزك بالمعاني غميقي حله ريالٍ تنقله في مخابيك مملوك بين الناس ماهو عتيقي

عبدالعزيز ضعيان البدراني
***

حنا عرفنا الحل والله يحييك يامن وصفت اللغز وصف دقيقي ترا النقود بحالة الضيق تغنيك كم سهلت لاهل الثرى من طريقي

عبيد الله جهاد العنزي
الرياض