قلبي يابن صالح همومه شعنه
شعي القطيع اللي شعاهن عقيدي
لقفابهن من خايع زد رعنه
فوق النضا ومعسكرات الحديدي
على وليف صار حبه مظنه
حبه بقلبي كل يوم يزيدي
النوم من عقبه عيوني جفنه
عقب الغضي عيت عيوني تهيدي
حسبي على الايام يوم ابعدنه
من بعد قربه راح عني بعيدي
غرو غرير والمدامع بكنه
ما له حلايا في زمانه فريدي
عليه نفسي يا سعد مستجنه
حبه جرى بالدم وسط الوريدي
وعليه اجر الصوت بالفين ونه
اشكي هواه وغير شوفه مريدي
شفقن على شوفه وقلبي يحنه
كما تحن الخلج للي تريدي
خلج تجر الصوت لحوار هنه
ثم جالهن عليه هم شديدي
وايضا بعد قلبي كما اخلاجهنه
زادت به اللوعات من عقب سيدي
لوعات بعده فالحشا لوعنه
ما كنه الا فوق حام الوقيدي
بعض الظروف القاسيات امنعنه
بنك الصبر غلق ولابه رصيدي
حالي قضا وهموم قلبي برنه
بري الدبا لغصون خضر الجريدي
والعاشق المغرم همومه بلنه
قلي يابن صالح ورايك سديدي
وبينت لك ما كنت بالصدر اكنه
ورسالتي تاصلك عبر البريدي
ختامها عد النجوم المدنه
صلوا على محمد شفيع العبيدي
