سلامي يا ولي العهد لك ممزوج ورد وعود
تفوح عطورها في مجلس شوفتك تزهابه
منايه شوفتك يا سيدي وتحقق المقصود
اشيل لشخصكم صورة بنون العين واهدابه
تحقق مطلبي والحمد للي كلل المجهود
بشوفت سيدي والقلب رحب به وهلا به
هلا يا مرحبا من خافقي اللي بالحشا موجود
يفز وينطرب شوقاً بشوفة سيد احبابه
هلا مليون في مليون ترحيبي بدون حدود
نعبر عن هل الطايف بحبك وانتغنا به
عظيم الوصف محمود المكارم والفعل محمود
بكفك سيف أبو طالب ردي الحظ يبلابه
اذا نسنس نسيم الصبح وان هبت هبوب النود
نفاخر كلنا في فعلكم ثم انتعزوابه
عضيد الفهد والي العهد دمتم للبلاد فهود
وأمناً عم ديرتنا ترى هيبتكم اسبابه
كسيتوها بثوب الأمن ضافي والفعول شهود
ومن ينوي يتعشى بالوطن أنته تغدابه
عزومٍ من حديد ولا تلين وسيفها محدود
وناراً تصطلي واللي يخون الدار يصلا به
عسى الله يحفظ القايد وعل أعماركم في زود
وبرحم فارسٍ ثبت لنا هالبيت واطنابه
اعطاها الوعد ثم أوفى بوعده ما اختلف بوعود
ويوم أقبل عليها اعلنت عن خطبته والناس خطابه
عشاشيق تمنوها ولاذوا بالفلاه شرود
بعد صقر الجزيرة جالها واشهر بمخلابه
بدا مثل الصباح المبتسم زاح الليالي السود
بروق سيوف مشعلها وزاح الليل مضرابه
رياحٍ عاتية هبت وجا معها الرياح رعود
تزلزل كل شيء قامت تزيح الصخر بترابه
أبد ما جته تتمايل وتنثر شعرها المكدود
تعب وأتعب لها رجله ودهم الخيل واركابه
خطبها والمهر نفسه وسيفه ما معه انقود
وبندق يقذف البارود دخانه ومشهابه
خطبها بالسيوف المرهفة والنار والبارود
ونفسٍ ما تهاب الموت بل للموت طلابه
بهم سيل العرم سايل ولا وقف خطاها سدود
مطر رحمه علينا وارتوت به نجد وهضابه
عسى يمطر على قبره هماليل المطر وبرود
بعد ثبت خطاه بموطني محدٍ تهقوا به
تظللنا بظل الشجرة اللي اسمها آل سعود
تقينا من هجير الشمس وانجا البرد ندفا به
وناكل من ثمرها اللي بخضر غصونها العنقود
تتدلى به غصون الخير طيب الجني واعنابه
أصولاً ثابتة والفرع في جو السما ممدود
وتأتينا أكلها كل حينٍ وانتهنا به
ولا منا انحسدنا كل صاحب نعمة محسود
يدوم الخير والحاسد عساه يشقق ثيابه
حمدنا الله وصلينا وطفنا والآنام رقود
عرفت الفرض والسنة ردي الفكر مشقابه
حلفنا ثم حلفنا اننا لآل السعود جنود
وعاهدنا على المصحف وهاك العهد نحيا به
عهود موثقة بقلوبنا شايب مع مولود
رضعناها بسن المهد طول العمر نغذابه
نعادي من يعاديكم ويشهد ربنا المعبود
عهود صادقة ثم صادقة ما هي بكذابه
عهوداً صادقة ومورثة من أب ثم جدود
ومن خان العهود الصادقة فالنار أولابه
كلامي من صميم القلب واقوله بدون قيود
ولا هو سالفة مجلس اقوله واتسلابه
