يا جامع الدنيا ترى الدنيا تزول
كان انت غافل ما سمعت افعالها
لو طولت لابد ترجع بالنزول
ولابد من يوم يهل هلالها
قدامنا بالضبط وصّفها الرسول
سواة شجرة زال عنك ظلالها
لابد من يوم عن المال معزول
واللي جمعته للمره وعيالها
لو يسألونك ماتعبر وش تقول
ونفسك ذليله رايحه في حالها
وجاك الوكيل اللي مكلف بالنزول
ولاحد يشوفه يوم نفسك شالها
لابد من يوم على اللوح محمول
وودوك حفره لازم منزالها
المنزل اللي فيه دايم ما تزول
ما دام ربك ما نفخ واوحى لها
تراك يا مسكين فالفخ محبول
افطن لنفسك وانتبه لاعمالها
كان انت غافل عندك كتاب الأصول
اقره وشوف النفس ويش اولى لها
كانك تخاف ومتبع هدي الرسول
ابشر بدار يعجبك منزالها
وكان انت طول العمر فالباطل تجول
ابشر بنار والحجر يعبالها
وصلاة ربي عد ما تجري السيول
وعداد سكان الدّير ورمالها
على رسول ما حدث عقبه رسول
ايد كلام الله وضده زالها