يا الله ياحيٍ على الكون موجود
ياواحدٍ بأمره منايا عباده
يارب يامعبود ياخير معبود
يارب تلهمنا الصبر والجلادة
وترحم فقيدٍ مسكنه في ثرى العود
والخلد بالجنة مع أهل الشهادة
في عدن والفردوس تنعيم وخلود
وبرياض عليين بيته وزاده
وتجعل ابو نواف من زود في زود
وتعطيه يامولاي غايه مراده
اللي مشى لرضاك باليسر والكود
والخافية والمعلنه في العبادة
كم جاه معتازٍ من الوقت ملهود
وفرج همومه دون ذكر واشادة
وكم من يتيمٍ دمعته حزن ونكود
تجري على خده وتعلن حداده
تكفّله من عقب ماهو مضهود
وتغيرت دنيا الشقا والقراده
مكارمه ماتنحصي ما لها حدود
كل العرب جتهم بشاير مداده
وأقفى سليل المجد راضي ومحمود
في سيرةٍ بيضا قوي الإرادة
مرحوم يامن قمت في كل مجهود
وللخلد يامعلّي بيارق بلاده
ياراعي الطولات ياناطح الكود
مامات من فعله يخاوي مجاده
رحلت عنا واضحت ايامنا سود
بيومٍ تعانق مشرقه مع سواده
وهلت عبايرنا وبقلوبنا رعود
حزنٍ على من شالنا في فؤاده
ولنا العزا بأسرة هل الخير السعود
حكامنا اللي معتلين الريادة
هم ذخرنا عن كل حاسد ونمرود
وحنا لهم رهن الأمر واشتداده
وتحفظ فهد يارب يامرسل النود
وتكسيه بالصحة لباس السعادة
والموت ذا دربٍ طويلٍ وممدود
لابد ماتمشيه البشر دون إرادة
ويا الله ياحي على الكون موجود
ترحم نزيلٍ كان وجهك مراده
