يقول من زيّن بقافه معانيه
جته المعاني طيب ماهي نهايب
يا الله ياربٍ نخافه ونرجيه
تغفر ذنوبي ياجزيل الوهايب
من بعد ذا والشعر طابت قوافيه
حبرٍ على القرطاس كالشهد ذايب
العام هذا لو بغينا نسميه
ماله اسم ياكود عام المصايب
عام المصايب روعتنا لياليه
ياكم لقينا به همومٍ صعايب
وليت ياعامٍ علينا بلاويه
قامت تهامل مثل وبل السحايب
أول مصيبه يوم ابن باز نرثيه
وعقبه فقدنا من المشايخ حبايب
وفي يوم عشره من شهر خامسٍ فيه
مات الذي للخير حث الركايب
مات الذي نحب شوفه ونغليه
عقبه قلوب الشعب صارت عطايب
ياناس ابو نواف لاحل طاريه
هلت دموعي فوق خدي سكايب
أبكيه انا والناس لاشك تبكيه
كلٍ بكاه اليوم حاضر وغايب
مرحوم يا اللي حبه اليوم نشريه
كل شرب حبه صغير وشايب
مرحوم يا اللي مارجع يوم ناصيه
إلا وهو ربحان ماهوب خايب
مرحوم يا اللي نبع الاحسان بيديه
يعطي عطى اللي مايخاف الغلايب
ياكثر مداته وما اكثر حسانيه
خيره وصل للاجنبي والقرايب
ابو اليتامى طاهراتٍ خطاويه
وابو الضعوف اللي يسد النوايب
ان جاه مهمومٍ بعطفه يسليه
ضمّد له بعطفه جروحٍ لهايب
وان جاه مضهودٍ همومه تجزيه
يرجع وقلبه من عنا الوقت طايب
وان جاه مديون من المال يعطيه
يرجع بمالٍ ماحسب له حسايب
عسى السحاب اللي بعاد مناشيه
إذا ادلهم اتهب تحته هبايب
حتى تسوقه سوق خيره يباريه
ويصب خيره فوق ذيك النصايب
ياقبر ونِّس وحشته لاتعنيه
فيصل له فعولٍ عظامٍ عجايب
ليت المنايا راعي الطيب تخطيه
وتصيب نذل ولاتصيب النجايب
لاشك مادامت لحيٍ امانيه
ان جنبه سهمٍ يجي سهم صايب
سهم المنايا عقب عيشه يخليه
وسط اللحد ومعصَّبٍ بالعصايب
والآدمي لو فرّ موته يلاقيه
مار الحظيظ اللي من الذنب تايب
ترى الحظيظ اللي فعوله تنجيه
عند الحساب وعند نشر الكتايب
ثم الصلاة عداد فرضٍ نصليه
على النبي المصطفى والصحايب
