ياالله ,, ياهل الحمد,, ياخير محمود
قضاك فينا ,, والقدر,, مالهن رد
وياالله ,, غيرك للفنا,, وانت موجود
منّا الرضا الدايم بما جد,, ويجد
انت الحكيم ,, العدل,, وافعالك سعود
مايحمد بمكروه غير انت ,, ذا الجد
منك البشر,, واليك ياالخالق تعود
واعمارنا بيديك ,, لادعيت ترد
والعمر حبلٍ للمخاليق ممدود
ولابد مايطوى ولو طال وامتد
لكن بعض الخلق بالطيب مشهود
وفرقاه زلزالٍ يهد الوطى هد
لو ينشري فيصل من الموت,, ويعود
كان افتدته انفوس ناسٍ بلاعد
راع الفضايل والمواجيب والجود
اللي له بكل ارضٍ احتاجته يد
مير القدر مكتوب,, والعمر محدود
والكل منا منتظر رحلة الجد
كم ميلت بالحزن فرقاه من عود
وكم سيلت بالدمع فرقاه من خد
وكم قلب مفجوعٍ بفقده ومضهود
وكم والهه صوت النبا قدها قد
يارب,, فيصل في مجاورك ملحود
وانت الكريم ورحمتك مالها حد
اسبل عليه العفو ياناهي الجود
وارحم وفوده,, وانزله منزل الود
وياالله,, يامحصي عدد كل معدود
عده مع اللي في ذرى جنانك يعد
وافرش لابو نواف ملفاه بالعود
ووسع بقبره في مدى شوفه ومد
واحسن عزا اهله عنه,, ياخير معبود
واجبر مصيبتهم ,, وزد صبرهم مد
