صاحبي والقلب اشوفه ما استراح

كل ليله والهوى يمي يميل

اذكرك واقول ياليت الرياح

تنقل الأشواق وان قدرت تشيل

واحسد اللي بالهوا صف الجناح

لا بغى يقرب خليل من خليل

يوم ليلك بالغلا لابس وشاح

والهموم الها على خدك مقيل

احسبك للعين ميراد قراح

واحسبك للقلب مقيال ضليل

لين شفتك تهتوي ضرب الرماح

وانت ما تقوى على فك الدخيل

كل جرح منك لا غنيت صاح

من عرفتك شامخ مثل النخيل

شف بقايا الليل في وجه الصباح

كنها ذكراك في يوم الرحيل

ما بقى للدمع ياكود الجراح

وما بقى للحب وادي ما يسيل

ولا بقى للذنب عذر للسماح

كود شوف النور لريال البخيل

مير روح من شمال البرق لاح

اتبعه وآنا على همي كفيل

ابتعد ذا الحين هجرك مستباح

والله أنك ما تمر إلا ذليل

ما دريت ان الغلا لا طاح طاح

لين شفتك دمعه عيت تسيل