يوم الوطن يوم مجيد وذكراه
يفخر بها شيب البلاد وشبابه
يوم به الذكرى تباها وتزهاه
في واحد الميزان يوم غدابه
كل الوطن دولة نظام ويرعاه
من وحده بالمفخره واعتنا به
عبدالعزيز اللي بنى المجد وأرساه
وأسس لنا دولة سلام ومهابه
جاهد وكافح مستعين بمولاه
ثم بأخوياه اللي على الدين لابه
أمن وطنا في الفلاة وقراياه
والشاة ترعى ماتهاب الذيابه
بشرع العدالة بدد الظلم واقصاه
وقت القهر والحيف قفت ركابه
وخلا الوطن في خير وأسعد رعاياه
والشعب للعليا بفعله رقابه
ياالله عسى الجنة مقره وماواه
عبدالعزيز الله يجزل ثوابه
خلف لنا انجال على الطيب شرواه
نهج العدالة كل منهم مشابه
سعود راعي الجود ماأجمل سجاياه
زبن المخيف اللي لجا وانتخى به
راعي الوفا للشعب ماأكثر عطاياه
الله يكرم في المنازل جنابه
ومن بعده الفيصل بعد له ومسعاه
في صالح الاسلام كل درى به
نهض بشعبه بالمكارم وخلاه
يحسب وفي كل المحافل حسابه
الله عن الاسلام آمين يجزاه
خير وعسى جنات ربي رحابه
ثم حكم خالد بعدل ونواياه
خير البلاد وعز من كان مابه
العاهل العادل بدينه ودنياه
عون الضعيف اللي شكا والتجابه
ياالله عساه بجنة الخلد مثواه
آمين يارب سريع الإجابه
واليوم أبوفيصل عسى الله يرعاه
عز البلاد وغيث ممطر سحابه
الحاكم اللي للوطن طور بناه
تقدم عند الدول يقتدابه
هو خادم البيتين بالمال والجاه
نعم الاسم نعم اللقب له حظى به
الجود طبعه والمكارم مزاياه
عهده رخا كل رغد واهتنابه
الله يحفظه بالمعزة وياقاه
في حلة المحبوب والاغيابه
وصلاة ربي عد من صام لرضاه
على النبي الهاشمي والصحابه
