ما انت الأول لا تغيب ولا تهرب

فيه بعدك مثل من هو كان قبلك

الشدايد تبعد أقرب من تقرب

لا تضايق مد بأرض الجود حبلك

شرق التفكير والا عنك غرب

والله اني ما اتجاهل فيك نبلك

ويش عذري وانت كالحر المعرب

اتشره وانت بالمدح احتسب لك

ارتوى هالعود بالضيم وتشرب

قبل شعري في عتابي ينكتب لك

كل يوم احس بعدي واتغرب

يا زماني يمكن اني ما انتسب لك

ما حصل لي منك ضحكه واتطرب

غير لحظة من نهبت ومن نهب لك

ادري أني مثل غيري فيك جرب

الحلا ,, والمر,, وأكثر ضيق سبلك

شرع الميدان لا زلت أتدرب

لو عجاجك فيه يسبق وقع وبلك

من يقول اللوم يصلح ما تخرب

من يظن الوقت من كيفه سلب لك

ليه انا بالذات؟ مدري لكن الرب

يعلم اللي داخل الصدر انكتب لك

ما انت الأول لا تغيب ولا تهرب

مثل ما أنت الناس من بعدك وقبلك