نشرنا في العدد السابق في ملحق تراث الجزيرة لغزاً كتبه عبيد الله جهاد العنزي ويقول اللغز:

افدني عن ثلاث مايجي لك مايجيهن فال ولاتلقى الذي بالعيد يامحفوظ يلقنه معيشتهن حصى في كل عام فوقهن يتهال كما ضرب البرد مستسلمات مايردنه مقيمات على وجه الثرى من سالف الاجيال رموز مايواخذ بالشريعة من رماهنه

وقد توالت الحلول التالية:

ربيعٍ يشبع الحاشي ولايسوى الشعير اريال الارض مربعه ريح الخزامى يا الله الجنه ثمان اشهور من غرة ربيع اول الى شوال مزون الخير بامر اللي منشيهن يهلنه مطرهن بالصحاري والجبل فوقه تقل شلال وجواً معتدل يحتار فيه الوصف وش كنه الا يا الشاعر اللي هرجتك يبحل بها العذال ليا جيت ابمنى فارم الحصى واحرص على السنه

***

هلا يا مرحبا بالشاعر اللي يبدع الامثال هواجيس على شفه وكيفه ما اخلفن ظنه عرض لغزه بصفحات التراث ولا اعجز العقال يعرفه كل مومن يفهم القرآن والسنه ترى الجمرات حل اللغز مايحتاج كثر اجدال نهار العيد نرميها بحصوات كما البنه هذا علم الصفا يابو جهاد وطال عمرك طال وعسى من حج بيت الله وزاره يدخل الجنه

***

عسى غر السحاب اللي من المنشى لهن اهمال يمرن دارنا والغيث لاومرن يهلنه ثلاث ايام ماطرهن حقوق وكل وادٍ سال ولايذكر شعيبٍ بالجزيرة مايعلنه حياهن مع بكور الوسم قشعه يذهل الرجال يطيب الكيف وسط البر والخفاق يحينه والا ياللي نويت الحج حاذر لايجيك اهمال صفات الحج نفذها تماما واتبع السنه عليك اركان تممها وسير ختمها باعمال (ثلاث اجمار) ترميها وتطلب ربك الجنه

***

سلمت وسرني لغزك هلابك عد سيل سال عقب شفته ندبت افكار راسي لين حلنه ترى حله بوسط ارض لها يامكثر الترحال يجيها اللي يخاف النار يبغى دونها الجنه هن الجمرات بالموسم عليهن الحصى ينهال (رموز مايواخذ بالشريعة من رماهنه)

***

قرينا لغزكم ياصاحبي واليوم انا حلال الا ياعبيد لغزك واضح والزين في فنه ثلاث جمار نرجمها بوقت الحج يارجال ولايمكن تعداها حظيظ من رجمهنه الا يامن يريد الخير لايذخر بزود اعمال ترى الدنيا مشاغلها كثيره واسع للجنه

***

على صفحة تراث اللي تتابعها زحول رجال ويشرف فوقها نخبة شبابٍ مابهم لنه قرينا اللغز جاك الحل ياللي تبدع الامثال تهيض عقب ما راحت فصول الصيف والكنه الاوهني من هو ياعبيد الله يشد رحال وكمل حجته يرمي الثلاثة يتبع السنه

***

هلا يامرحبا قبل الجواب ارحب وخذ فنجال جوابٍ يضحك حجاجه من الفرحة قبل سنه يقوله واحدٍ مايجهل المظهار والمدخال لون الماء بعيد احياله الجزلة يجيبنه غيابك ياعبيدالله عن الالغاز كنه طال واخاف انك تقول اللغز لافرضٍ ولاسنه صحيح انه هواية وانت مايخفاك يارجال والاجيت ابمنى برم الحصى وطلب لنا الجنه

***

ترى لغزك قريته ياوسيع المعرفه والبال وعقولٍ قاصره بابه تراهن مايهجنه ابحله بحلٍ مابعد صاغه ولاحلال عسى من حله ومن رتبه واوحاه للجنه شهر ذي الحجه اللي قبل ماقبله شهر شوال نفوس المسلمين لبيت رب البيت حجنه نهار العيد رمي الجمرة الكبرى عليه اقبال مع الثنتين مشعرها مع التكبير رجنه

***

ولغزك واضح وبين وانا لالغازكم حلال وكم من واحد فكر وحل اللغز في فنه ثلاث ليا استطعت الحج تلقاهن بوسط الجال وسط وصغير واكبر جاءت بالقرآن والسنه لزوم ترمي الجمرات والله يكتب الاعمال قبل طوف الوداع ونطلب الغفران والجنه

***

افيدك ياعبيد الله وردي ياصلك بالحال ونا نوم الملا والله عيوني مايذوقنه ترى مقصدك جمرات ثلاث ولابهن اشكال في يوم العيد ترميهن بسبع ولايردنه

***

نفيدك ياعبيد الله على لغزك بهذى الحال سؤالك واضح حتى النساء قامن يعرفنه هي الجمرات يوم العيد تبدا بالرمي وتنجال لرجيم للذي ابعد ابونا ادم عن الجنه ولايكمل حجيج الله كل الحج يارجال اذا ماهو رمي الجمرات ولاشي بلاهنه

***

هلا يامرحبا واعداد مايمطر سحاب خيال بمن صاغ البيوت وكل شخص قد قراهنه ترى حل اللغز واضح ولابه ياعبيد اشكال ومنهو حج بيت الله لزوم قد رما هنّه هي الجمرات نرميها بسبع كامله عدال عسانا بعد هذا مهتدين ونتبع السنه

***

بدينا بالكريم الواحد اللي للعقد حلال عظيم الشان رازق كل من طاعوه بالجنه عزيزٍ بين دروب الحرام وبين الحلال وفرض حجه على خلقه وله الشكر والمنه بعد هذا نويت احل واشارك مع الابطال بلغز الشاعر اللي ماشين بالهدي والسنه وترا لغزك يابن وايل عرفته ياعريب الخال تراه الجمرات ولابها شكه ولاظنه

****

تحيه عامره بالود والتقدير والاجلال تحيه ياعبيدالله على مذهب هل السنه تركت الدار قبل البارحه من صجة الاطفال وجبت الحل بالتاكيد والادغام بالغنه (ثلاث جمار) مشهورات بالاقوال والامثال رموزٍ مايواخذ بالشريعة من رماهنه

***

هلا يا مرحبا ترحيبةٍ فيها علوم رجال اخص ابها الجزيرة والتراث ومن قراهنه ترى الجمرات حل اللغز ترمى في ثلاث ليال كتبه الله وسبع من الحصى هذا جزاهنه

***

عدد ماناحت الورقا وعدد مايصرف من المال هلابك ياعبيدالله ياشاعر معجباً فنه ترى (الجمرات) يالغالي حصا من فوقهن ينهال بثاني العيد نرميهن ثلاثٍ في عددهنه

***

تراث اهلاً بها يوم ان بالصفحه يبين رجال لها احروف تعرف الدرب والمخطي يردنه عبيدالله عساك بخير يابوجهاد وكيف الحال وخذ علم عن الجمرات يفيدك دون مامنه

***

الا ياللي كتبت اللغز تبغى حل من حلال هلابك عد ما لجلج على نجد العذي كنه ترى من حج لازم يرمي الجمرات يارجال يطبق ماورد عن صاحب الطاعات والسنه

***

ابا ابدا بالسلام اللي كما رش المطر همال وشكري للمحرر والمعد اللي ظهر فنه وابا اخبركم عن اللي سابقاً في سالف الاجيال ابوقتاً للنقل نختار هجناً مالهن حنه مشى جدي على عوص النضامن ديرته ماعال يبي يحج ويحقق امر مولاه والسنه ويبي يرمي على الجمرات حصواً فوقهن ينكال وهذا حل لغز اللي نشر قافه ولاكنه

***

على نظم القوافي قلت خوذو ردها بالحال من اللي لابد انظم القوافي مايعجزنه اصوغ القاف وانظمها وانا اللي مستريح البال ولو تصعد زحل معك القوافي معك يرقنه توجهنا على مكه نسوق الروح وايضا المال واقول الشكر للمعبود راع الفضل والمنه رمينا (الجمره)الاولى نهار العيد يارجال ومنهو حج ولم يفسق ترى موعود بالجنه

***

ضيوف الرب لاجل رضاه شدوا للحرم رحال لفوا للبيت حجاجٍ عسى مأواهم الجنه يقاسون المشقه والتعب با لحل والترحال يأدون الشعائر مثل ماجتنا بها السنه نهار العيد يرمون (الجمرات) اللي كما التمثال ثلاثه ثابتاتٍ في مكانٍ مايتعدنه