لا نريد أن نذكر في كل عدد ماهية توجهنا ولكننا سنبدأ بالتصحيح والله الموفق:

بالاختصار المفيد أنا أبيها كذا أبي اتغدا بها قبل اتعشابي

حاكم مشعل المعلا
يا حاكم,, ياحاكم بالله حاكم نفسك,, أنا ما أقول كسر حاشا لله.
ولكن قبل "اتعشابي"قوية ماش نغص فيها لا قلناها,, خلاص بتغيرها شكراً لسعة صدرك.

في غيابك جرحتي الما وعوّد زما ما ذبحتي فصدري زهرة البرتقال

بدر الحمد
والله منوّر يا بدر,, بس ياخوك "في غيابك جرحتي"ما تظن إن فيها نظر,, إلا والله في نظر وسمع بعد ما تجي جرحتي يا بدر إلا أن تقول "في غيابك جرحت الما"وهذي بعدما تجي لأن الشطر الثاني,, "ما ذبحتي"الله يهديك يا بدر الشق أكبر من الرقعة,, "زهرة البرتقال"!!!

رد الهنا لعمري ترى الحب برفرق لا تزود أشجاني تراني هدية

موضي الرشيد المساعد
سنا البرق
الوزن ممتاز ما فيه أي كلام,, لكن بالله يا سنا البرق كيف طلعتي قاموس خاص فيك ونوهتي أن هدية ترى معناها "هادئه".
اسألك بالله هل هذا يدخل العقل هديه - يعني هادئه يا شيخه,, لو أننا هنود ما دخلت عقلنا إلا إذا كان قاموسك فارسي,, وسلميلي على المعاني سلامٍ واجد لا واجهتيها,, مهوب الظاهر.

أنا بروح لأبوي بأسرع مع العيس واسبر مهام النوق والنوق يرعن

مغلي العرقين
حلوه روح الأصالة,, لكن الأحلى قصيدٍ موزون وأنا أخوك وشلون وزنت أنا بروح لأبوي,, ما تنوزن لو بونش إلا إذا قلنا أنا بروح أبوي بأسرع مع العيس وطبعا ما يحتاج أوضح الركاكة فيها,, بعدين يا مغلي بأسرع مع العيس ما عمرنا سمعناها وين يا خوي ذلولك بخاخات وإلا أيش,.
ثم القافية حقتك ممتازة أول بيت طبعاً والثاني يرعن حلو والله القافية ومن بعد اليوم ما عاد فيه عجز قوافي ما دام أحدٍ يفسر على كيفه والثاني يحط التنوين قافية,, ويا ليتك رحت لباريس,, وخليت العيس للي يعرفونهن,, ولا قلت أنا بروح أبوي في كشن كابريس,, وسلم لي على الوزن.

تعبت أسرح في ظنوني وأعاني وأدري فرح دنياي كله بدينك

مليحة الفودري
والله يا مليحة شِعرك مليح ولو هي بالخواطر قلنا ممتاز بس البلا كيف حولتي "بيدينك"بقدرتك وموهبتك الشعرية الفذة إلى "بدينك"وكيف صارت قوافيك عينك - وحنينك - وسنينك آسف على كثر الأسئلة بس ودي أعرف علشان أعلم ابن لعبون والقاضي.

أنا يا اللي تعاقبني وفاكر نفسك أستادي أنا اللي جاهلٍ فيها وهي من فوقك أستاده

دماث
دماث ,, يا دماث,, كيف الحال,, استادي يعني ملعب وشلون يعني القصيدة في ملعب,, إيه توني عرفت قصدك استاذي عادي ترى كل شي يصير علشان القافية تجي استادي وتجي استاذي وتجي حادي بادي وتجي خيط بيط,, بالله هذا حكي استادي يعني استاذي والمتحدث مره ذكر ومره أنثى,, لا حول,, والله الفرق:

كن في قلبي سنا ضو ربعٍ نازلين ولعوها في خلا والهبوب تلوفها

الله يرحمك يا بخوت هذا القصيد اللي يعجزون عنه بعض الرجال.
ويا ليت بنات جنسك تعلمن منك.
أيها السادة الظاهر إننا بنقبل التعازي في الشعر الشعبي,, ومن له مطالبة عليه سرعة مراجعتنا,, والظاهر إن اللي يطلبهم الشعر واجد وهو متنازل بس بشرط يتركونه وما عاد يكتبون اسم شاعر,, إلا بمغص,.