إلى قصرك العرف عَنّز على شيخ
يحكي لك اثارٍ ويروي لك اشعار
الشيخ عنده من علوم التواريخ
وفي مجلسه تلقا النوادر والاخبار
احرص على شعر الفحول الشواميخ
ملاحمٍ تثري على طول الادهار
ودوّر بالاشمل والحسيني وابا الميخ
سوالفٍ تبقا للاجيال تذكار (1)
ما بالنخل يالقرم غير الشماريخ
وباقي الكرب والخوص مثواه للنار
اتبع هل السنّة ولا تتبع السيخ
لا صرت في تمييز الاديان محتار
العام تلعب بالتيَل والنفافيخ
واليوم تجلس بين الاخطل وبشّار
لا تحسب ان الشعر تشليق بطّيخ
ومفطّحٍ طول الظهر خمسة اشبار
الشعر دوّخ قاسي الراس تدويخ
انشد عنه وسط المجالس هل الكار
وهو مثل من دس لك سمّ زرنيخ
وانَته تحسب انه يفيدك وهو ضار
ما يمتكن عود القصب يكسر الصيخ
ولا انثنى من واهن الخيط مسمار
والنور بين والحقايق مصاليخ
لو لَفلَفوهن بالغطاوي والاستار
خذها نصيحة دون لجّه وتصريخ
إختر ولا شعر المجلّات تختار
شعر مصخ والعور زادوه تمصيخ
ودخل عليه الفنّ مع كل معبار
تجاهلوا دورا شقر الريش طخطيخ
واثنوا على راغب علامه وغوّار
وخمة بناتٍ هايفاتٍ صماليخ
توافدن من حلبة الرقص والبار
ما فيه من ينصح ولا فيه توبيخ
وما فيه لا بان الردى قيد وهجار