يازين زولك يابعد كل مزيون
ياشمعة في الدار يبرق سناها
ما نيب داله عنك أنا صرت مفتون
وأنته حياة الروح وأنته دواها
وتراك ياروحي على الحال مامون
وارفق عليها لاتزود عناها
والله ما اسمع فيك لو هم يعذلون
ومهما يقولوا الناس يتبع رضاها
شوفتك عندي ما تقدر بمليون
وأنته هوى نفسي ومروى ضماها
كفٍ وخد وعنق ورموش وعيون
وسبحانه الرحمن زود حلاها
وعساك يايوم جمعني بمضنون
تضفي عليك مزون يمطر سماها
ولا والذي كل البشر له يصلون
انك دوا روحي وغاية مناها
