يضيع الليل الأسود في سواد عيونك الثنتين

ولكني أشوف بغرتك وجه القمر ساري

سرابي يمك الشوق الدفين ولا سألته وين

أخاف من السؤال يضيّعك مني وانا داري

ألمّ الجرح بأعماقي وأقول لونتي بعدين

زبنتك قبل قولة (ويش فيك) وقلت لك باري

كفيتك همّ نشاد الجريح اللي نسى السّكيّن

على حمّى الصواب أطراك وأنكر جرحه الطاري

بريت ولا بريت ولا حسدتني من صوابك عين

ولا أسرجت الدروب ظهور خيل تطلبك ثاري

على ما بي سكتّ وكنت,, لكن,, وين أنا هالحين

متاهات الغرام احيان لا جنة ولا ناري

شعوري صعب تحليله لياجت للصحيح الزين

عجزت اعرّي أوجاع الكلام بجرحي العاري

صدق من قال: ما خلاّ الأوايل شيء للتالين

أقوله يوم صرت آخر زماني وأول أسراري

ألا يا كثر ما كنت السعادة قبل أعرف البين

وألا يا كثر ما كنت الأسف وإن قلّت اعذاري

أبا أحلف لك وأنا عارف ترا مالك عليه دين

وأقول إنك ظما روحي على نهر الهوى الجاري