عبري يا شعوري فوق بيض الصحايف

كل كلمة بقلبي واجبك تكتبيها

بين قلبي وصفحات الدفاتر تحالف

كل لا شفت صفحات البياض احتويها

ايه انا والورق والليل دايم ولايف

السهر والقمر وسهيل شاهد عليها

اتعبتنا الليالي والزمان المسايف

كلها ضدنا ما نقول يمكن حديها

يحفظ القلب واللي ينطقن الشفايف

وحجة المدعي لا بد من شاهديها

والليالي تراي اشوف فيها الكسايف

كنت احاول بها لكن تطلق يديها

اظهرت لي بها الايام حد الرهايف

واجبرتني على البيعه وانا مشتريها

فعلها بان في وسط الضلوع النحايف

اتعبتني وانا من قبل كنت ارتجيها

لو بها خير ما يبكون فيها الضعايف

اليتيمة تنادي مالقت والديها

تنثر دموعها فوق الخدود العفايف

هذي افعالها الله حسيبي عليها

بعتها بالرخيص ولا عليها حسايف

بعد ما شفت فعلتها حشا ما نبيها

ياهل الهرج يكفيني كثير السوالف

يكفي اني مضيّع دايم الفكر فيها