يا عين يم بيوتهم لا تلدين

الوقت طال وحبهم ترتجينه

ليتك عن النظرات فيهم تجوزين

الزين حال الياس بينك وبينه

حتى ولو إنك لبابه تمرين

غضي النظر يا عين لا ترفعينه

ما فادني شوفه له شهور وسنين

والعاشق المظلوم وش في ايدينه

غير السهر والهم والناس ممسين

وجدواه تصفق في شماله يمينه

ربي خلق كل الاوادم مساكين

كل بلاه وسبته شوف عينه

واليوم الا يا عين تكفين تكفين

جرح الفؤاد التم لا تجرحينه

الجرح جرحه بعدما ينتهي شين

والقلب باللي فات لا تذكرينه