عزي لقلب بين الأضلاع ماجي
موج الخباري سيل مزن يخجه
قبل احسب ان القلب ما هو رواجي
واثره خفيف الريش سهل مهجه
وعيني اللي هدها السهر لاجي
يومه رماني بالعيون الملجه
لا تعذلون القلب عذل سماجي
لا تقهرونه يوم خلي توجه
يا هيه ياالمملوح سفر الحجاجي
تذبح خفوقي والحشا بغير حجه
الهون هونك يا عنود الزراجي
مدت ولدت واعرضت عقب هجه
يسقيك براق سرى له لعاجي
يشعق بعال الغر ضوحه يشجه
يكفي كفى ورد الشراب الهماجي
ابي المطر قبل السواقي ترجه
