عند البحر دون شطه مسهر عيوني
تلعب بقلب هواجيسه وتومي به
مغير اهوجس وافكر متعب جفوني
في صاحب راح ماجتني مكاتيبه
فارق وانا من سبب فرقاه مطعوني
من قبل عامين يابن عبيد علمي به
اعض روس الأصابع زادت شطوني
باسباب وقت يعذبني باساليبه
شمل المحبه عثابه خيب ظنوني
قلبي تحطم ولا حقق مطاليبه
انا اشهد ان الهوى يذبح وملعوني
لاعاد درب الهوى لاعاد تجريبه
امس اتمتع بحبه ناسي حزوني
افرح وابادل عشيري في تراحيبه
واليوم كني سفيه العقل مجنوني
مافيه ظلع طويل الا وأعدي به
وشلون بانسى هواه اليوم وشلوني
عيني تبا شوفه وقلبي يهذري به
عينه وسيعه وخده بارق مزوني
مثل البدر نوره العربان تسري به
الله يرجع ظعونه يمة ظعوني
حتى يفك الهوى مني كواليبه
