آه واعيني اللي طولت في سهرها
يوم كل رقد عيا يجيها رقادي
من كثرد مع عيني قل منها نظرها
كل ما قلت يكفي دمعها حيل زادي
مثل وسمية هلت علينا مطرها
ديمت بامر ربي سيلت كل وادي
آه الا واشقاها حالي اللي دمرها
سيد بالحشا حبه تسيد وسادي
بعدما تل روحي وبحنانه غمرها
صدِّ عن وتناسى حبنا والودادي
ارفق بروحي اللي لحظ عينك اسرها
يا طموحي بها الدنيا وغاية مرادي
يامنى الروح بعدك بيضها مع سمرها
مثل نار الحطب ما بعده الا رمادي
يستحي من جمالك وردها مع زهرها
من يماريك يا المزيون يخسر وكادي
ناهي النفس وهو اللي بنفسه امرها
تنقش اسمه ورسمه فوق صفحة فؤادي
جابر النفس وهو اللي بنفسه كسرها
يوم عزم يلوعني بنار البعادي
وين ذيك الليال اللي مضت مع قمرها
قبل ما يسلك المجمول درب العنادي
ليته اتعود للي صابر ينتظرها
واتهنى بقربك يابشر غير عادي
