الله لايرضى لهم بالمهونه
عديت بالرجم الطويل الموالي
بطويق كل الناس مايجهلونه
بين البطين وبين حزوا زمالي
فوق الحماده مشرفاتٍ ركونه
جلست في راسه وحيدٍ لحالي
مدهال شيبانٍ قبل يدهلونه
خطلان الأيدي مكرمين السبالي
ملح القهر بيدينهم يشغلونه
ياما وياما في زمان مضالي
مشيت باطرافه وهم يقنصونه
أقفت عليهم مظلمات الليالي
مثل السراب اللي زما الحزم دونه
حي الى مني ذكرته غدالي
مثل الهيام وبالمعاليق كونه
ذقنا مرارتها على كل غالي
الله يمضيها بستر ومصونه
لو انها ماتاخذ الا الهزالي
كان الردي لاراح ما يفقدونه
خطوا الكديش اللي من الهم سالي
مثل خروف العيد يتنازبونه
لامجلسٍ بيّن ولاله دلالي
وإن جا لزومٍ يقصر العلم دونه
وخطوا الولد قحزان بدر الكمالي
يمشي بدربه والعرب يتبعونه
فكاك عقدات النشب والجدالي
اللي على الاقراب تضفي ردونه
فرقٍ بعيد بين الاول وتالي
لاشك بعض الناس مايبخصونه
المجلس اللي ماتجيه الرجالي
وش عاد بالكاشان لويفرشونه
بعض الحزوم أزين على كل حالي
ليصار راعي الحزم ربعه يجونه
يامن يبشرني عسى نجد سالي
وعسى الجفاف اقفى وقفت احتونه
للسيل يامنتج قروم الرجالي
الله لايرضى لهم بالمهونه
