يا حاضر الحب لا تنشد عن الماضي
ذاك انتهى والزمان المر ناسيته
تعال سد المكان اللي بقى,, فاضي
لا يشغلك من بغيت اوّل وخليته
كانك بغيت العلوم طوال وعراضي
بس الوكاد ان جرح الوقت عديته
يوم ان نوضك,, على جال الهوى ناضي
تباشرت به عيوني يوم حييته
عساك دايم على درب الغلا قاضي
ياللي احساسك بشعر الحب حبيته
عوّضتني عن زمان فات,, واعتاضي
قلبٍ عقب ما يشوف الهم داريته
رضيت بك يالغرام وخافقي راضي
ولقيت فيك الحبيب اللي تمنيته
خلاص طمن خفوقك واترك الماضي
ترى خفوقي شغلته واستحليته
