يارب مافي البر والبحر والغيب
تعجل لنا قول سديد وضافي
إذا نظرت الناس شفت الأعاجيب
أحد عمي واحد ورد عذب صافي
ضيع شبابه تايه في المحانيب
يارب يجعل له من النور شافي
سوف له الشيطان بالشك والريب
زين له الدنيا ونسي القوافي
يوم ان يكون الناس ولدانهم شيب
وانت أرغل عاري والأقدام حافي
غافل وجاء يوم الشهود الكتاتيب
أظهر لك الجبار ماكان خافي
فإن كان تخشى العيب فاحذر من العيب
في موقف منظور والوزن هافي
انظر لوردك يوم خطف الكلاييب
أحد نجا وأحد علته السوافي
اين المناصب والرتب والأصاحيب
ومال خبي يطعمه كل قافي
وفقد الوسيط وفقد الأنساب والصيب
وفقد الترف وأضحى به النور طافي
ومن ظن بالرحمن عمل طيب
يطمع بفوز الموازين تافي
حب الكرم خلقه صبور لياصيب
يدعو توال الليل ماهوب غافي
صلى بقلب حاضر لادعا أجيب
وجوارح تعرف سجود التجافي
وان كان صاحب مال يدي المواجيب
فرايض من جابها قيل كافي
والصوم جنّه فاكرمه بالتراحيب
واحرص على ليل به الأجر وافي
فلعله آخر صوم لك يابن تركيب
وتكون ذكر القوم بعد التلافي
والبيت حجوا له على شمخ النيب
يعلون عسر اجبالها والفيافي
واليوم سهل سيرها بالمراكيب
بعد البطا والخوف صارت عوافي
وبعض الشباب أعياه خبث المشاريب
في سيرهم مثل القطيع المقافي
اصابه هيام وصار يشكي الحواجيب
واتعب قريب دايم الدوم رافي
ولاشفتهم بالسوق مثل العواسيب
ولاجاء العطل يمسك سراً بالمرافي
ولاجاء نهراً فيه حك العراقيب
ظنيت مايحسن سواة الأثافي
ولو كان ابوه مجرب من مناجيب
ياطا الحفا سمراه مثل الخفافي
وبعض النساء فيهن كثير العذاريب
فكن ضيغم عن ماتكدر يعافي
دايم تسوف وضربها بالعراقيب
عسفت علىماشان وقت العسافي
تنشد عن العطار حول القصاصيب
لبسن يعيب وحمرة بالشفافي
يصلع لها كوم جبته الحطاييب
يشتب نار ماتجيها المطافي
وفيهن حرار وافيات المناقيب
طبع سليم وذكرهن العفافي.
