احمد: سرى الليل وانحن النجوم المراقيب
وانا خاطري ما بين روحه وجيه
انا ما استريح الا ليا انه عوى الذيب
الا واهني من يسمعه واهنيه
حمد: ترى الليل توه يأهل العز والطيب
صفوف تدف صفوف والنار حيه
انا وانت يا شاعر بحكم المعازيب
وذيب الخلاء بالليل رجله جريه
احمد: ترى اللي يوثق في يديه المقاضيب
بعيد عن الطيحه بوسط الركيه
انا اظن ظن ولا حد يعلم الغيب
يقولون اهل مسكه تجاوب ضريه
حمد: على الله على الله مع طويل المجاذيب
موثق يديني بالحبال القويه
خفاف العقول امضيعته التحاسيب
وانا وأنت وسط السهلة الجرهديه
احمد: انا ما اعرف الرجال قبل التجاريب
وترى نية الرجال مثل المطيه
انا سامعٍ العام غارة تريحيب
وجاب الرباع وجاب رأس الثنيه
حمد: انا باعرفك قدام يالع بك الشيب
زمان الخوي بالضيق يسعف خويه
على ناس والا ناس ما سبع الحبيب
خطاه رمضان وفات عيد الضحيه
احمد: تغير العرب من فوق عوج العراقيب
يقولون وقت فات في الجاهليه
زمان الضوامي يرشحن المغاريب
ونفس فقيرة غير نفس غنيه
حمد: لعلك في اللي ينطحون المواجيب
لياء شان وجه الوقت تحذا الحذيه
يحن الجمل شقران مع سكتة البيب
يهجرع برجوى المزنه العقربيه
احمد: انا ما احسبه يدخلك شكه ولا ريب
وانا ذمتي من كل زله بريه
اظن الجهل بالناس عيب وعذاريب
تركد وخذها في يدك من يديه
حمد: الا يالمرتب عارف التراتيب
واظنك ولد سرحان ولا حليه
على الكنس اللي يكسرن المصاليب
تعبر الفجوج بساقة الدعوجيه
احمد: ترى الغيص ما يصلح وهو ما معه سيب
وانا اعرف هذي وهذي وذيه
عذبنا سواة اللي تهز المشاعيب
ولا اخطي ولا ارضى بالخطيه عليه
حمد: نعرف الدعاوي والحجج والاساليب
واقول القضاء ذا الليل قيس القضيه
يعاف الفزع من ذاق ضرب المخاليب
وانا ما نقلت بجيبتي مقلميه
