مالك عن المكتوب يالعبد صده
اما قصر ممشاك والا تجي له
مكتوب مابه عنك حي يرده
من خير ولا صار عكسه بديله
والعمر عجلات الليالي تعده
وليا وفت خل البلاد وخليله
ومن لاجراله بأول العمر هده
تاليه ما يمديه لاقل حيله
الطيب دونه شاحة مجرهده
تثني مرام اللي عزومه ذليله
ما يدركه من طاب خاله وجده
ولا هيب ورثة ميت ينتمي له
يقوله اللي بيح الصبر سده
لين اشتكى بالقلب هم يشيله
له غايةٍ عنها الليالي تضده
يومه كفاح وطاوله سهر ليله
لاشك عيني للفرج عقب شده
يفزع لنا من ساق نحو المخيله
يمدنا باللي نبيه ونوده
حب الشرف وارقاب رأس الطويله
الرأي يا سلطان لاجاك بده
من واحد بعد الولي تشتكي له
اشهر وخل مواسدين المخده
اللي رقود ولا وراهم عقيله
النوم عيد اللي ثليله يكده
ماله شقى الا لهوته بتعديله
والا الرجال بشانها مستعده
ولا هم سوى بافعالهم والحصيله
