ياعمر ماعينت؟ ماشفت؟ ماريت؟
شفلي تراي اليوم شوفي كباشي
عيني بها مثل الرمد لو تداويت
دمعه يفوح إلى أطبق الجفن طاشي
من كثر ماغمضت والا تعاميت
عليّه من الحرمان والوقت غاشي
ماشفت لي سيد البني شمعة البيت
اللي الى لبست زهت للقماشي
بنتي رباب اللي له اليوم غنيت
حبه بصدري راتعن به وماشي
أصغر بناتي يوم أخصه بتصويت
وأضعف عيالي حال مابه عراشي
دورت له في كل ركن وتحريت
أسمع صراخه والعبث والهواشي
عبثه تخطم لي الى أقبلت وأقفيت
خشفٍ بلفتاته وعوده نشاشي
الى ضحكت لي من همومي تشاويت
فرحة عجاريفٍ هروجه هشاشي
أحلى على كبدي من الماء الى أشفيت
والذ من وبلٍ هتف ,, من نواشي
شف وين هي ما اسلا عنه لو تهقويت
وافطن تراي أهديك نصحي بلاشي
خلك مع أخوانك مثل ماتمنيت
وأحرص عليهم عقب طوية فراشي
ياعمر خلك صاحيٍ لي الى أوميت
وان قلت لي جنّب فدربي عفاشي
كل المعاني ياعمر يجمعه بيت
أفطن للب النص خل الحواشي
احرص ولاتاطى على بقعة الزيت
ان مازلقت وطحت طالك طشاشي
ماتنفعك في كل الأحوال ياليت
درب الخشاش أبعد عنه للخشاشي
ولا الندم ينفع الى منك الويت
حب قبل تمشي بكل المماشي
خلك على جن المجانين عفريت
ولاتذل النفس ولاتخاشي
ولاتعرض للوعر لوترهيت
خل الجمل لابليس يكفيك حاشي
ولاتغشم الدرب الى منك أنويت
ولاتنفدع لاصار مالك مهاشي!!
