ياللي عليه تشتكي ضيقة البال
يامن امصيبك من زمانك احزوني
تشكي ظروف الوقت ياطيب الفال
وشكواك,, يامشكاي هاضت اشجوني
تبي الصراحة كلمة الحق تنقال
جتك الاجابه ياولد واسمعوني
الصبر زين وضيقة البال تنجال
لابد من عقب الحزن تفرحوني
مالك عن المكتوب منهج ومحوال
والرزق عند اللي ينشي المزوني
وايام عمرك كلها ايام وليال
ياسرع من دنياك ماترحلوني
لاشك اخذ كلمة لها دور فعال
فعال معناها لمن يفهموني
ياصرت متعافي ترى مابه اشكال
كل المشاكل بإذن ربي تهوني
يهون ما يصعب اليا سملت الحال
مادمت في صحة ولا فيك لوني
ما تنتعوض صحة الحال بالمال
ولا به عوض للحال مهما يكوني
ما تنفع الدنيا ولا المنصب العال
لو كان تفقد مبصرات العيوني
ومن ينكر الصحة من الناس جهال
ناسٍ على اوتار الجهل يعزفوني
هذا مثل للي يحبون الامثال
وان كان ماهو مكتمل فاعذروني
