جاني يقول الوصل لا تقطعينه
خلي اللقا ما بيننا دايم الدوم
قصده يرجع ما مضى من سنينه
يحسب غلاه اللي سكن قلبي يدوم
صديت عنه وقلت والله لا دينه
وشفته يطالعني بنظرات محروم
ناديت فيه وصحت الله يعينه
قلبك ما دام ان الوفا فيه معدوم
غلطان كانك تحسب اني رهينه
ما نيب انا اللي في الهوى تقبل السوم
عود نسيت الحب شينة وزينه
ومنك ترى بالذات يكفيني هموم
ما قد جبرت القلب يبدي حنينه
وشلون ودك تجبره وانت مهزوم
العام كنت اسهر عشانك حزينه
وانت عشان الغير ما تعرف النوم
والحين يوم القلب بيح كنينه
عودت لي مشتاق بالحب موهوم
آبي اعتذر قلبي غدا في يدينه
خل تبع في الحب عادات وسلوم
يفداه كل اللي يبي من ظنينه
يبشر ترى قلبي غدا فيه ملزوم
وإلا انت لا تحلم ابيعه واهينه
حتى لو انت من الخطا صرت معصوم
